離鄉別井的故事｜移英情侶求職失敗決定追夢開Cafe
HOY TV節目《離鄉別井的故事》日前亦訪問了一對移民英國的香港小情侶「Yammie」和「阿晞」，二人由中學時代起到英國留學，最後更決定離開香港，直接在英國定居。兩人在中學時期已在英國留學，阿晞大學修讀市場學，Yammie則修得建築學碩士學位。不過，學業有成的二人在英國搵工路上亦處處碰壁，Yammie指自己曾寄出超過200封求職信，但大部份都沒有回音，最後二人決定追夢開Cafe。
掏空積蓄開Cafe 生意差到節目上爆喊訴苦
兩人掏空二人大部分的積蓄和家人支持，以20萬成功開設名為「Kōfuku 幸福駅」的Cafe，盼能將亞洲美食帶到英國。不過Cafe的生意額十分不穩定，初期周末試過營業額達到1,600英鎊（約港幣$14,378元），平日則介乎100至300鎊，到拍攝前一段時間生意非常差，每天僅得100英鎊營業額（約港幣900元）。英國稅收高加上生意差，令Yammie忍不住爆喊，全因父母問她有沒有辦法交租，坦言「就算交唔到都唔會同佢哋講交唔到…佢哋已經好多嘢俾晒我」。
餐廳食物曝光 網民秒get生意差原因
在節目播出後，不少網民都討論起節目內容，更有網民起底Cafe，了解一下Cafe的食物。但就在餐廳的食物相被流出後，大批網民就即時理解為何Cafe生意差！從流出的食物照片可見，店內要價8鎊（約港幣73元）的辣醬涼麵是以白烚的烏冬配上同樣白烚的粟米、香腸、蝦、魚蛋、生小蕃茄、切絲的青瓜及包裝蟹柳，最後在上方加上一匙辣醬及蒜蓉，十分簡單；磨菇飯則與香港KFC的出品十分相似，但肉眼可見醬汁不多。
網民：打完邊爐之後個日嘅lunch？
大批網民見到相片後都笑言辣醬涼麵猶如「打完邊爐之後個日嘅lunch」，可以改名為「邊爐盛」，直指涼麵比起葵廣賣的撈冷麵更hea：「依家開食肆門檻咁低？煮俾屋企人都反枱嘅嘢居然可以開舖，仲妄想有錢賺？」更有網民苦口婆心勸說：「小學生家政？完全冇賣點，已經唔係講緊話好食同唔好食，試問個個人（就算唔識煮嘢~手殘）喺屋企求其是但都做得出嘅嘢，使乜要畀錢去嗰度食？喊都改變唔到乜嘢，建議疊埋心水打份唔好要求咁高嘅工好過啦！」
直斥兩人無做資料搜集及市場調查
另外亦有網民指兩人在開店之前沒有做好資料搜集及市場調查：「呢間cafe 11點先開門，西方國家咖啡店都係早開早關門嘅（6-7am開門，3-4pm關門），而家睇埋d 食物相，完全明白間舖點解無生意啦」、「日本名、港式hea麵、目標客戶英國人，照牌面睇你已經一次過得罪3個地方嘅人，不如諗清楚定位究竟你想賣啲乜嘢賣俾邊啲人」。
