揀牛油果方法＋6大好處｜切開變黑肉？水果檔主教你揀靚牛油果＋辨認完熟度

牛油果切開變黑 原因解構！

1. 船運 VS 空運

根據黃大仙大成街街市林記水果檔主林先生的facebook帖文，由於牛油果產地多為墨西哥、智利、厄瓜多爾等中南美洲國家，運輸到海外的成本頗高。

故此，不少商家寧願慳成本用船運，而大部分船運水果，都經過急凍程序，水果經急凍後，內裡的生命力、新鮮度就會減弱，亦稱為「死肉水果」。

保存期一般只有2-3日，只要內裡的急凍雪水溶化散去，牛油果就會開始腐爛，切開就會出現黑肉、黑絲。

林先生亦在文中透露，採用船運的牛油果，最少會有50%機會出現黑肉腐爛的情況，若果熟透而切開冇壞，絕對純屬好運。

而另一個成本較高的方法，就是空運了。正如很多日本水果一樣，搭飛機運送的水果，一般都會於機內雪房冷藏保鮮。

加上空運快，冷藏的水果也不會「雪壞」，行內人又稱為「活水果」，即是依然有生命力，會自然變至可食用的完熟狀態。

至於來自厄瓜多爾的牛油果，林先生則指是百分百飛機貨，品質好，肉滑味濃，保存期也相對較長。不過因為價錢稍貴，有部分唔捨得買來吃的客人，戲稱它為「呃鬼阿婆」牛油果。

2. 定價各不同

話明飛機空運成本貴，牛油果的品質和價錢絕對成正比。林先生就在帖文公開，飛機空運的牛油果，每個的成本是$10或以上，定價自然較高，大約每個$12-$17。

但同時也衍生出「去貨慢」的問題，因為價錢貴，客人自然卻步，店家賺的利錢少，貨又囤積，甚至等到水果變壞都賣唔晒，成本也賠掉，風險極大。

相反船運的牛油果，成本低，商家可定價為$20 4-5個，作為客人，心理就會覺得抵買，甚至覺得買到壞果，浪費的都是幾蚊幾毫，冇咁肉痛。

去貨快，薄利多銷，所以市面上絕大部分的牛油果都是船運貨，只有大型超市、小部分水果店或果欄欄商才會引入空運的牛油果。

所以一分錢一分貨，以後想吃到冇黑肉、高質的靚牛油果，記住要識睇價錢！

林先生亦於文中坦言，以往父親擺檔，賣的都是船運牛油果，雖然去貨快，卻不停收到客人投訴，說牛油果變黑。

後來決定引入飛機貨牛油果，客人大感滿意，但同時因為價錢貴，銷情不算理想，有時也令他覺得心灰意冷。

其實，與其買平價牛油果，切開變黑，不如嘗試一分錢一分貨，支持有心的小店小檔呀！

如何辦認完熟牛油果？

1. 觀察表皮

根據《Nutrition Diva’s Secrets for a Healthy Diet》作者表示，深綠色至紫棕色的外皮是成熟到最完全的顏色。

如是青綠色，你至少還需要等待4至5日，直至稍為變黑。還有綠色的底，就表示1至2日的時間差不多。

2. 輕輕按壓

除了可以從表皮觀察牛油果的熟成度，還可以用手感覺。

用手輕輕按壓牛油果，如感覺到有微微軟熟而有彈性，絕非如按在牆上的死硬，便代表其狀態為接近完熟可食用。

3. 留意果蒂

亦有網上流傳的方法，就是將牛油果頂端的果蒂揭開，如果呈深綠色，代表狀態完熟，接近可食用；

但如果是青色，則代表仍未熟透可食；如果蒂為棕色就代表已經過熟了。

牛油果保鮮方法

雖說空運的牛油果品質較優，但牛油果切開後擺放太久，同樣會有氧化的情況出現。

如果牛油果只吃一半，想保存保鮮，可以擠些檸檬汁或白醋、壽司醋在牛油果上，然後用保鮮紙包實，再放入雪櫃，這樣大約可保鮮2日左右。

當然，新鮮水果最好就盡快食用吧！

食牛油果6大好處！

講完牛油果點樣揀，究竟這種superfood有甚麼益處功效？即刻數畀你睇！

1. 食牛油果有助減肥

牛油果熱量高，加上內裡的脂肪屬於單不飽和脂肪，有助增加飽肚感，不少人都愛用它來幫助減肥。

不過1個200克的牛油果含320卡路里，建議吃半個已夠。

2. 幫助清宿便

現代人生活忙碌、飲食不定時，很多人少吃蔬果而缺乏纖維素，再加上運動量明顯不足的狀況下，腸道不能正常地發揮作用。體內堆積了宿便 ，腸內會因此產生毒素妨礙新陳代謝，使免疫機能低下，成為各種疾病的根源，隨時引發口臭、暗瘡、消化不良等的健康危機。

而牛油果就有豐富纖維含量，半個牛油果已經有成大碗烚菜的纖維量，有助排走便便！

3. 皮膚保濕抗氧化

肌膚時常乾燥繃緊、痕癢不適，甚至嚴重至浮現乾紋、脫皮，除了滋潤的護膚品，更要從源頭為肌膚保濕。

有營養師指出，每日飲用6-8杯水其實並不足夠，因為肌膚還需要四大養分：維他命A、 C、 E及 Omega-3，才能維持肌膚健康。

牛油果就包含大量維他命E，具有強力的抗氧化功效，能夠阻隔自由基對細胞的侵害，延緩肌膚老化。

4. 增強抵抗力 幫助預防流感！

春夏時冷時熱的天氣，令人容易生病。唔想做藥煲，就要加強抵抗力。

當中Omega-3可以增加白血球產量，幫助免疫系統對抗病菌。而且它是一種不飽和脂肪酸，幫助維持細胞膜健康，減低發炎機會。

5. 防脫髮！

正所謂「有頭髮，邊個想⋯⋯脫髮吖」，男女聽到都怕的脫髮問題，原來食牛油果可以有救！

事關牛油果含有大量的脂肪酸，可加強頭髮韌度及光澤，最能「美髮」。

6. 聰明啲！

成日被人笑係「蠢豬」、被「腦細」叫你「醒少少」？雖然先天條件IQ的因素幫唔到你，但食牛油果原來都可以令你醒目啲。

它的維他命E可幫助預防自由基或其他外來因素破壞腦部細胞，有效令人醒少少。