日日返工咁辛苦，放假梗係想同朋友去旅行玩番餐㗎啦！不過「相見好，同住難」，去旅行日對夜對，有冇試過頂唔順朋友做嘅嘢，返到嚟搞到反晒面，仲發誓以後都唔再同佢去旅行先？近日有網民喺討論區開咗個topic，大數同行友人嘅惡行，一齊睇下你有冇中過招啦！
盤點與朋友去旅行7宗罪 網民：真心好煩冇下次
1. 嫌酒店污穢，但自己又污糟邋遢
有網友話女性友人嫌酒店廁所污穢，用自己特有嘅方式「無影櫈」去廁所，但又搞到廁板都係尿。而且自己啲垃圾唔清都算，又唔畀清潔姐姐入去執房，實在認真恐怖。
2. 唔幫手plan行程又嫌三嫌四
傾行程嘅時候又唔想出力，所有嘢都話冇所謂、冇意見，乜都唔幫手搞。結果去旅行嘅時候就嫌三嫌四，去邊都嗌悶，全程剩係識埋怨，好難冇怨氣！
3. 黑口黑面又發脾氣
去旅行都係想開心啫！成個旅程無時無刻都喺度黑面，咩都要嫌一餐，一唔歡喜就發少爺/小姐脾氣，搞到周圍朋友嘅心情都差晒，咁仲可以點玩落去啊？
4. 帶埋港女性格去旅行
有網友呻話，明明佢朋友想去布吉同陽光玩遊戲，結果去到又話怕曬黑，全程都開遮，最重要係把遮仲要插到佢隻眼。
5. 浪費旅行時間
旅行時間咁寶貴，好多人都會想爭取每一分每一秒咁玩同觀光。雖然未必要好似跟團咁6至7點就起身，但起碼唔好瞓到黃朝百晏吖大佬……
6. 1蚊都要計到足
有網友話同朋友去日本，「連1 yen都要計到足」。去深圳東門買咗件34蚊人仔嘅衫，後來見到其他地方賣平啲，朋友又即刻黑面，仲要黑足全程。
撰文：Alva｜編輯：CY圖片來源：《閨蜜》劇照、新傳媒資料庫、《金錢戰爭》劇照