機票優惠格價平台：Trip.com丨Klook
酒店住宿格價平台：Trip.com丨Hotels.com丨Booking.com
景點門票及當地遊優惠平台：Klook丨KKday
飛機揀位貼士1. 前座位有好有唔好
我自己呢，就唔鍾意坐咁前嘅，因為每個compartment(機艙)第一排，即係我哋叫嘅 bulkhead seat其實都係bassinet seat，即係嬰兒籃位，短程還可以，長途的話，你又怕嘈的話，真係要等個BB瞓著，你先瞓得著。我無意歧視帶BB travel嘅人，只係BB/小朋友的確係難控制啲。
飛機揀位貼士2. 旅行團專坐後排
通常機尾都會係安排畀旅行團或人數多嘅旅客坐比較多，所以嘈嘅機率亦較高，怕嘈嘅話，可以盡量避免。亦都係較近洗手間，被打擾嘅機會就較高。另外，每個compartment最後一排有時都會有客鍾意，佢哋貪後面冇人會踢到佢哋張椅，兼且可以無後顧之憂咁大挨去後面。不過要留意番，有啲飛機最後一排係limited recline – 即係可以躺後，不過角度冇正常位一樣咁躺到最盡，自己考慮下啦！
飛機揀位貼士3. Bulkhead同emergency seat=legroom seat
有好多人對呢啲位有特別喜好，因為可以伸長對腳，我自己就一般般。Bulkhead其實係第一排位，都係有塊板擋住，對膝頭嚟講，係冇嘢擋住，但係腳尖有＝一樣都係伸唔直⋯⋯我情願坐普通位，都仲可以放對腳落前面椅底。
Emergency seat 係可以伸得直，依家好多airlines都會攞嚟賣(即係額外加錢先可以坐) 。但留意番，廣體客機先至會係伸得直，窄體機的話，其實你前面都係有位，只係座位之間距離闊咗，所以睇你自己喜好了。仲有，部電視係要喺個位下面拉上嚟，拉上嚟唔係重點，起飛降落冇得睇先係重點，係電視精嘅噩夢⋯⋯然後，armrest又攞唔起(有啲情侶鍾意攞起個armrest，坐得親密啲或瞓落男友大髀，呢啲位都做唔到㗎)，我自己就真係對呢啲位麻麻歡喜。
機票優惠格價平台：Trip.com丨Klook
酒店住宿格價平台：Trip.com丨Hotels.com丨Booking.com
景點門票及當地遊優惠平台：Klook丨KKday
飛機揀位貼士4. 窗口位睇風景
好多客坐窗口位都係想睇風景或者冇人打擾(只會佢去廁所時打擾到人)。如果你好鍾意睇風景，可以留意下Flightradar24.com呢啲網站，睇下自己班機嘅航路，大約你會掌握到坐邊一面窗口，會睇到你想睇嘅嘢。好似呢班機，回程東京返香港坐右邊窗口應該睇到富士山，自己發掘下啦！戴番頭盔先，航路未必日日一樣嘅，但可以參考下！
飛機揀位貼士5. 中間位
不幸地飛機滿座，自己本身又冇留到位，得番中間的話，我個人就鍾意坐中間嘅中間位(如果仲有得揀)，比起窗口嘅中間(即係B、J)，中間嘅中間(E、F)係你出去洗手間就要人起身，但如果你冇需要，係可以瞓到落機。坐B、J的話，A、K去廁所你都要讓路，真係really bad！
飛機揀位貼士6. 留意特價upgrade
有時有啲航空公司會於當天嘅航班，以特價賣出商務或者特選經濟艙，唔同航空公司有唔同package，有啲可能剩係賣個位，食就食番普通餐，有啲可能係全套upgrade有埋貴賓室、商務餐，價錢有時會超特惠，尤其是長途機，upgrade咗真係唔同好多，瞓醒先落機，有興趣豪一次就問下地勤人員啦~
飛機揀位貼士7. 趕轉機
如果你之後有班機要駁，時間又係好tight嘅所謂perfect connection，可以的話，試下問地勤攞個較前嘅位，有時有啲航空公司開counter前，都會scan下有咩客係有tight connection嘅。點為之tight connection呢？穩陣啲問下有冇前啲嘅位，早啲落機去轉機，人都安心啲。
飛機揀位貼士8. 做個有公德心嘅旅客
見過網上有啲所謂旅遊攻略叫人上網揀位，專登留個吉位喺中間博冇人要，呢啲行為係極為缺德嘅做法。好多時尤其是旺季，好多人都係一家幾口去旅行，當然人人都想同番屋企人朋友坐，往往就係好多人咁樣留，令到好多其他客人坐唔埋一齊。全部大人都還好，有小朋友分開坐真係慘，然後就向航空公司投訴，可惜啲位係客人留嘅，我哋都冇權叫人讓出佢哋留好嘅位。將心比心，做個有品嘅旅人。
撰文：地勤夫妻去旅行
飛機揀位有甚麼技巧？
正所謂好嘅開始就係成功嘅一半，坐飛機就係旅程嘅開始，即睇：地勤教8大揀機位貼士
搭飛機暈機浪怎麼辦？
去旅行，少不免會舟車勞頓，如果你有暈車、暈機、暈船浪等問題，真的會令人非常痛苦！以下這8個方法都可以幫到你。詳情請看
