每當我自己一個人行旺角，唔想食太貴，又唔想同人迫。但旺角係人口重災區，就算你去戳串魚蛋或一條麻甩佬去吉野家打邊爐都要排隊。我只想一個人靜靜哋食個飯。所以，我每次都會去旺角朗豪坊商場可以穿過對面嘅熟食中心。嗰度真係美食天堂，窮人嘅恩物！
熟食中心「養大」好多人
仲記得以前細個，各區街市嘅熟食中心，都係我老竇嘅至愛。嗰陣時屋企冇乜錢，細個亦唔識有乜要求，每星期全家人睇場戲，然後去附近嘅熟食中心食個飯，已經好開心。
而老竇最鍾意食，無論去到邊個熟食中心都必定會叫嘅，就係蒸魚飯。
蒸魚飯情意結
以前我鍾意試唔同嘅嘢食，西多士、乾炒牛河、兩餸飯……唔明白老竇點解次次都食埋同一樣嘢。
但到我大個咗，去到茶餐廳或熟食中心，最鍾意就係食蒸魚飯。
「呢啲飯有乜好食啊？條魚又多骨，得豉油……」女朋友每次都咁問我。
「好食啊！」可能真係遺傳……
熟食中心是搵食熱點
難得放假同女朋友出街，有時都想「食好西」，但當自己一個人，我就會去搵唔同區嘅街市熟食中心搵好嘢食。
唔會有帶位，搭枱嘅通常係啲啱啱放工嘅叔叔嬸嬸，亦冇侍應招呼你，想食乜就自己去買，中伏叫到難食嘅亦冇得投訴。
香港地壓力好大！
諗深一層，其實唔單止食飯，香港人由出生去到死嗰一刻，有乜嘢係唔使同人爭㗎？
有父母講要贏在射精前，計算好嬰兒出世月份。
一出世要爭醫院床位，連講嘢都未講得好，就要上幼稚園面試班。
一直到出嚟工作，用三十年去供一層樓。退休之後發現連靈位都要同人爭……
食得是福
食飯想一個人靜靜哋，唔使同人爭位，有碗熱湯有個香噴噴白飯，乜真係要食間出名排晒長隊嘅餐廳先開心咩？好多阿叔食條蒸魚嘆份報紙一樣開心，開心本來就好簡單。