文：藍橘子
有一種生物比起扒手更兇狠，就係－－「強國人」
我自己都親身經歷過喺羅馬被人偷銀包，連去警局報案都困難重重，甚至警察都懶理，隨便幫你登記完就算……旅客只可以自求多福。
但放心，有一種生物比起扒手更兇狠，比歐洲警察更有阻嚇作用，就係－－「強國人」。
如果有留意新聞，前排有一位強國客喺巴黎被偷走一隻名貴手錶，兇悍嘅強國客當場將個扒手捉住，兩人仲大打出手。
結果唔需要搵警察，係警察自動趕到現場，送強國人返警察局落口供。
歐洲除咗流行扒手，連簽名黨都惡過人
另一個係我親身經歷，話說當時我參觀緊位於德國柏林嘅柏林圍牆紀念館，有幾位德國年輕人攞住塊登記板，不斷呼籲周圍嘅旅客簽名，上面寫住堆英文，大約內容係慈善活動之類。
當旅客以為只係簡單簽個名以示支持，咁就錯了。德國年輕人會叫你畀錢，唔肯畀錢就會幾個人包圍住你唔放你走。
冇錯，佢哋就係歐洲特產「簽名黨」。你可能會話：「唓～你唔好簽名咪冇事囉！」
當幾個簽名黨走過嚟我身邊，用英文問我識唔識英文嘅時候，我立即搖頭揮手say no。
點知佢哋瞬間變臉，仲用英文同疑似德文粗口鬧我，表情充滿惡意，仲特登好大力咁撞開我然後離去。
真係估唔到……歐洲除咗流行扒手，連簽名黨都惡過人。
人見人怕嘅歐洲簽名黨，被強悍強國人擊退
幸好，我哋仲有強國人。我望見幾個簽名黨走埋去問強國遊客簽名，強國遊客非常合作，一手攞起支筆就簽咗個大名。
但當簽名黨問佢哋拿錢嘅時候，強國人完全聽唔明佢哋講乜，亦畀唔到反應，簽名黨不斷遞塊板埋去，同強國客講「簽咗名就要畀錢」。
當然啦～厲害嘅強國人係唔會屈服！加上強國人去旅行嘅特色，就係一團一團人咁去。
突然間，一個平頭裝、肥胖身軀嘅強國人帶頭，後面跟住一班強國客，衝過去簽名黨度起哄。
雖然簽名黨都有幾個人，但氣勢、聲量同人數都不及強國客，結果夾著尾巴敗走離開。
不得不說，強國客嘅超強購買力，令好多國家都屈服，香港變到周街藥房同金舖、韓國所有化妝品店都有個識講普通話嘅店員、巴黎「老佛爺」商場幾乎９０％都係強國客……
正所謂以暴易暴，人見人怕嘅歐洲簽名黨，被強悍嘅強國人擊退。
免責聲明
內容及觀點僅屬筆者個人意見，與新傳媒立場無關。
