呢次同女朋友去韓國，兩個人一齊飲醉酒嘅經歷，真係畢生難忘。
是咁的，嗰次去韓國，第一次試飲真露，仲要係新出咗果汁味，勁易入口，一杯又一杯，配埋燒肉眨下眼就飲咗三支。
「不如叫多支吖～」
「好啊！嚟吖！」
不知不覺，我同女朋友總共飲咗五支，但發覺「好似飲得太多」已經太遲，成個人呆呆滯滯，連行步路都平衡唔到，我見女朋友對眼半開合，自己喺度玩緊筷子，我叮囑佢唔好埋單住，等我去個廁所，清醒番個人先。
「哦！」女朋友好大力咁點頭。
而當我去完廁所，喺外面吹吹風原地跳，然後行番入餐廳諗住坐多陣時，發現已經埋咗單！！
「點解埋咗單嘅？」我。
「你唔係叫我埋單先咩？」女朋友。
「我叫你唔好埋單住啊！」
「是但啦～好眼瞓啊！返酒店啦！」
結果，喺我半清醒嘅情況下，仲要拖住完全神志不清嘅女朋友由餐廳行去地鐵站⋯⋯當時女朋友行路嘅步姿，就好似一個嬰兒學行路咁，東歪西倒，跌與唔跌之間。
幾經辛苦，終於行到地鐵站。明明已經去過韓國好多次，熟晒地鐵線，但如今望住條線路圖，完全睇唔明點樣轉車⋯⋯
呢個時候，女朋友又發揮作用了。佢望見我遲疑不決，不停拍我塊面。
「醒啊！唔好搭錯車啊！」
「唔好拍我啦，好痛啊！」
「我要返酒店啊～醒啊～」
被佢狂攻臉頰催促下，突然，我胃部一陣翻騰，感覺到一陣瀑布由食道湧上喉嚨，於是我衝向前面個垃圾桶⋯⋯一擘大口，「嘔～」嘔吐物好似瀑布咁湧出嚟。
嘔完一輪，個人清醒咗唔少，但對於眼前嘅「傑作」感到相當內疚。
當時我半清醒嘅腦海諗住企喺原地等清潔工嚟，鄭重同佢道歉，呢個時候，女朋友再次發揮作用，走埋嚟拍我塊面，唸唸有詞講：「返酒店啊⋯⋯返酒店啊⋯⋯」
於是，我緊咬住一絲清醒，睇清楚點轉車，拖住女朋友上地鐵，途中佢雖然神志不清，但不停拍我塊面⋯⋯終於最後都成功返到酒店。
當晚係第一晚check-in，酒店職員要求我填form，但我醉到連自己個名都寫唔到，我見到自己寫緊一堆鬼畫符⋯⋯職員見狀嘆咗一口氣，叫我聽日先再填，交低passport就可以返房休息先。
結果，女朋友沖完涼，嘔咗一次之後就昏迷到天光。
我塊面被佢拍到腫晒都不特止，全晚每半粒鐘就起身爬入廁所嘔，嘔到天光都未嘔清，第二日行程仲要又頭痛又食唔落嘢⋯⋯
但女朋友仲相當自滿，話：「全靠我狂拍你塊面，你先可以咁清醒識得搭地鐵！」
嗰次之後，我發誓以後去旅行都唔飲咁多⋯⋯
