text：孖田｜photo：新傳媒資料室
最新視后李佳芯 《BB來了》演活港媽
Ali在《BB來了》不惜自毁形象（Ali自己都咁講㗎！），七情上面由「港女」演到「港媽」，道盡新手媽媽辛酸，難怪憑此劇奪得視后之位。雖然如此，早前更傳李佳芯決心成視后甘願延遲結婚生B，但又因傳媒推劇可能無緣攞視后，但最終無綫都給予Ali演技的認同。在頒獎禮上，李佳芯上台逐一多謝，她說︰「我要多謝一型允豬呀！我唔係贏在起跑線嘅人，我一直都好努力靠自己，做好眼前角色，我只係知一直都要做好。」
早前Ali的Instagram超過70萬追蹤者，為答謝一眾粉絲支持，Ali都好識做，大派福利。
入無綫6年星途佳
Ali 2012年離開有線加入無綫，初期多做綜藝節目主持，曾主持《學是學非》、《搵食飯團》等節目，加入無綫短短6年，李佳芯一直機會多多，很快就嶄露頭角成為上位花旦，形象亦正亦邪而且肯捱肯搏。14年於台慶劇《名門暗戰》中，飾演岳華情婦開始漸露頭角。
自《名門暗戰》之後，李佳芯多咗好多拍劇機會，好似《倩女喜相逢》、《潮流教主》、《巨輪II》等。Ali喺《巨輪II》入面畀吳岱融大鬧「臭雞」（臭妓女）令唔少人都為Ali覺得唔抵，而呢一套劇更令Ali演藝路更上一層樓；至到16年《律政強人》，Ali第一次擔正電視劇女主角。
《踩過界》入面Ali飾演法官，不過夜晚就放低嚴肅身份，經常蒲夜店做豪放女。
李佳芯喺《BB來了》豁出去演「港媽」唐恬兒，七情上面演活由女強人因有意外有咗而表現出做準媽媽的不安心情，獲網友激讚！
重溫李佳芯 多次上《新假期》封面
Ali加入無綫之前，可能大家未必記得她曾經是Cable藝員，當年亦都在旅遊記者界頗出名，經常跟《新假期》出trip，出名肯捱肯搏好相與，同《新假期》上山下海的經歷，由台灣、日本，去到意大利、澳洲、斐濟，最勁仲去埋南極！以下的封面同內容，眼利網民又記唔記得先？
01｜當model第一次 走勻全台灣影婚照（2005年）
13年前的Ali剛投身model界（當年「?模」呢個term仲未出現），還未做有線主持，第一次同《新假期》出trip，人生第一次的婚紗相就要走勻全台灣影。當年的妝髮造型今日睇起上來當然娘味十足，不過當年唔興過分的Photoshop、唔興假眼睫毛和大眼仔，Ali 靚樣同今時今日差唔多，證明靚樣真材實料啦！
攀山涉水擺甫士
影過婚紗相的人就知，靚相一般在兩日內瘋狂影晒。Ali在拍攝期間要著住婚紗攀山涉水、公路狂奔：爬上台南的七股鹽山、在青青農場拍攝薰衣草和野花遍地的場景，在38度高溫及長期曝曬下受盡折磨。
當年的記者憶述，拍攝當日台北天氣驟晴驟雨，拍攝團隊只好躲在車內，待雨停時，Ali立刻跑出車影，影不到兩三張又下雨了，又要躲起來。如是者，跟天公玩足一整天躲貓貓。Ali都以專業態度面對，第一次出trip，其實好難得！
翻閱2005年的陳年舊雜誌，當年記者好鍾意寫詩，而影相的攝影師亦好鍾意model頭戴一大朵花（利申：那位是台灣婚攝公司的攝影師）。
02｜天寒地凍 沖繩追櫻（07年1月）
為了向廣大的讀者報道日本的櫻花情報，本刊記者往往要帶同model 提早出發。去完台南的1年半後，Ali跟《新假期》記者2007年1月出發到沖繩，在短短5日拍攝時間內，要影櫻花又要影海邊resort。當年的記者指，那時候Ali已經是模特兒界的女神，過程雖然辛苦捱凍，但一樣好影冇架子有交帶。
春寒扮初夏 背心短裙頂硬上
1月的沖繩還是冬天，只有10度的低溫，但為了畫面好看，拍攝時全程要穿上春裝，背心短裙，女神一樣拍心口頂硬上，抵讚！
白滑背脊第一露！
要知道旅遊記者去一個trip唔止返一隻稿，當年1月已經要去影resort，你估下呢間冇人曬太陽嘅resort，當時有幾咁凍？就係咁，Ali首次露出了白滑背脊畀《新假期》同廣大讀者。
Follow Ali to……
去到海邊resort，蔚藍海岸耍脾氣，時晴時雨、大風、陰陰涼，女神毫不扭擰，要著bikini落水永不say no。最正係去到海邊，攝影師為滿足親近女神慾望，情不自禁，影了一大堆拖住著得性感嘅Ali女神隻手踏浪呀！咦！拖手相，咪仲早過Instagram手拖手遊世界的 #FollowMeTo情侶Murad Osmann！
03｜冇P圖！早過男神勇闖南極（07年11-12月）
翻查資料，當時的Ali 未做主持，但當時在model 界她都多見報，算搶手貨。原來女神仲早過洪永城兩年去南極拍攝（編按：洪永城在nowTV年代曾以幕後身分，與黃貫中前往南極拍攝《一個地球》），係咪威先？
辛苦捱到去極地
咪以為去極地就好爽皮，其實要坐足兩日半的飛機，由香港飛荷蘭落阿根廷，幾乎環遊全球，然後再捱30個鐘的船程⋯⋯聽到都想準備嘔吐袋。坐郵輪入南極，大浪到有如坐足兩日海盜船，而且南極天氣變幻莫測，能否如期登岸也需聽天由命。所以，女神每日就像飛虎隊般，隨時候命。
自備企鵝拍selfie
去南極當然想睇企鵝，但為保護牠們，規矩講明必須跟企鵝保持最少五米距離，以免影響企鵝的生活。唔知係咪女神太靚，（定手上的企鵝公仔？）對人類已沒有戒心的企鵝們也會自動走近，又或乖乖站在附近任影唔嬲。
陰功！出場少過企鵝
揭番當年本雜誌，Ali出場位主要在封面，文中幾乎只有冰山大相同企鵝相，當同船的大陸客也有full page赤祼照一大張，Ali只獲得細碎行行企企食飯典床版面，好在這輯照片重新「出土」，否則政府圖書館都睇唔番！
04｜終極一脫 三點式玩斐濟（09年）
雖然Ali 沒有好似一般?模出寫真集，平日出席大台活動都鮮有走性感路線，不過，女神其實一向不介意健康性感，2009年和《新假期》去斐濟時，就大晒bikini ＋長腿。
又到揭雜誌時間，斐濟出名陽光海灘，配上Ali同樣燦爛的笑容，你估下呢張拋花球青春少艾相出咗幾大版？
05｜跟水哥達人遊澳洲（09年7月）
2009年的Ali 已經成為有線主持，主持《體育王》，被網友追捧為「體育女王」，知名度已大大提升。《新假期》難得就到檔期邀請李佳芯去斐濟，同一個trip順便part埋飲食達人紀曉華Walter Kei，去埋澳洲塔斯曼尼亞嘆世界食好西。
當時去採訪的旅遊記者回憶，話說採訪塔斯曼尼亞東岸蠔場時，位處南半球的塔斯曼尼亞正入冬，到訪之時白天只有8-10℃，天寒地凍，Ali 和紀曉華都要著上「賣魚勝」裝束落水。咁嘅情況下，正常人都會嗌凍，但當時人氣已不俗的Ali 毫無嗌辛苦怕凍的，震住都快手開工。
06｜意大利慢食、揸靚車之行（08年5月）
跟住《新假期》出trip，真係為女神帶來好多難忘的時刻，好似08年的意大利都靈、五漁村之旅，女神就連續兩星期登上《新假期》封面。
靚景超開揚 名車趕羊
今次意大利之旅，Ali跟著記者採訪拍攝Alfa Romeo的四天古董車托斯卡納豪華自駕遊，當年都索價2千歐羅！不過坐在經典的Alfa Romeo Spider 1600老爺車中，駛過一片片鮮黃油菜花田，穿梭於一字排開的柏樹之間，享受頭髮被風吹起的感覺⋯⋯好屈機呀！
真正深度遊 意大利五漁村
意大利的五漁村（Cinque Terre）近年成為亞洲人的熱門之選，女神當年去到，除了學習地中海人悠閒步伐，在漁村影靚相，仲有機會大嚼當地海鮮同松露。
素顏零瑕疵
七彩小鎮 花絮曝光
