9個空姐空少口頭禪
01 | HAPPY AND SAFE FLIGHT
每次飛之前都會有個簡短嘅briefing，航班經理好喜歡叫大家set一個goal for the flight。
02 | MCC
即係指人哋「矇查查」。雖然大台航空公司咩國籍嘅同事都有，但係基本上所有國籍嘅同事都知MCC點解，應該係流傳已久嘅術語。
03 | EASY-GOING
字面上嚟講係指好易相處。由於每班機都有機會同未見過、未合作過嘅同事飛，如果一個同事真係easy-going，的確係好事。但如果有啲同事喺briefing嘅時候強調自己好easy-going，根據個人經驗所得，呢啲同事往往都冇佢哋自己講得咁隨和。所以某程度上，各位空服同事對easy-going呢個字都會有戒心。
04 | BLACK AND WHITE
意指跟足白紙黑字嘅規矩、守則等辦事。如果遇到啲好black and white嘅上司，大家就要打醒十二分精神！
05 | ON LIST
由於公司人數眾多，所以一啲同事會特別記錄低同某啲同事工作時需要注意嘅地方，再將成個list分享畀其他同事。所以，如果有一個同事係on list，就即係話呢位同事係需要特別提防㗎喇！不過咁，上唔上到榜其實冇乜特別準則，有啲時候純粹係兩個嘅八字唔夾就會被人放上list，同埋依家張list已經水蛇春咁長，參考下好喇，不能盡信。
06 | LOCK AND SEAL
本來係指飛機上面放酒水、免稅品嘅車，喺降落之前一定要用鎖同特殊封條封好嘅動作（因為要符合每個地方嘅海關法規要求）。
後來引申為機組人員到達外地後柄埋自己喺房，唔見人唔同其他同事食飯嘅行為模式。
07 | 有冇嘢幫到你呀？VS 自己嚟得喇！
當見到其他人忙緊嘅時候，同事們通常都會禮貌上問下有冇嘢可以幫手，而被問到嘅同事，好多時都會客氣婉拒。雖然聽落去好似好虛偽，但係大家客客氣氣嘅文化，的確喺空服員界入面紮根，禮多人不怪呀！無他嘅，大家都係想和和氣氣、開開心心做完班機就收工。
08 | HAVE A NICE REST！ VS HAVE A NICE FLIGHT！
有時候會喺酒店，甚至喺飛機上面遇到另一set機組人員，通常係一set啱啱到埗要放工，另一set準備上機開工。
09 | THANK YOU FOR THE FLIGHT！
TBB劇集鍾意用BBQ做結局，我哋行內每班機到尾聲嘅時候，都有句公式嘅結局對白㗎！每班機入面有咩恩怨情仇，千祈唔好太上心，大家一於一thanks泯恩仇，（跳起) yeah！