撰文：C｜攝影：Fion、新傳媒資料室
豊洲市場正式啟用！
有超過 80 年歷史的築地市場，其場內市場已於日前完成它的任務，而接替的豊洲新市場就緊接其後，在今個月投入服務！大家之後去東京，想吃正海鮮，就記得去朝聖一下。
豊洲新市場3大樓棟
1｜水產仲卸賣場棟：水產買賣市場、22間飲食店
豊洲市場主要分為3棟大樓，由市場前站出口往右直行，就會到達「水產仲卸賣場棟」（6街區）。呢度係各大水產魚店、壽司店嘅所在地，深受港人歡迎嘅「壽司大」就位處呢棟大樓嘅3樓。
行到「水產仲卸賣場棟」門口之前，會率先見到「關連飲食店舖」門口，裡面雲集咗22間飲食店，係3棟大樓之中最多食店嘅地方。包括「壽司大」、「吉野家」1號店等名店門前，朝早8點開始人龍已近50人（13日當日嘅公眾入場時間為早上10點）！而且食店層設計似商場，店面細小之餘，中間嘅通道空間亦非常有限，想去朝聖嘅朋友建議早啲去啦！
走出「關連飲食店舖」區後，轉右直行到盡頭，就到達「水產仲卸賣場棟」嘅入口。
進入後就係見學區，裡面展出咗一年四季之中，咩種類嘅魚/海產最盛產。
除教學性資訊外，仲放有漁販們使用嘅卡車，畀各位參觀者企上去影相留念。
但由見學區嘅大玻璃往下看，只見到好小部分嘅水產檔，甚至可以話只見到一條隙……想睇更多嘅，只能搭扶手電梯落1樓喇！
「水產仲卸賣場棟」仲有一個開放畀所有人進入嘅天台：「屋上綠化廣場」。搭電梯上5樓頂樓，再上條樓梯就到，賣點為可以眺望東京灣，亦可以望到東京鐵塔！但呢個綠化廣場係唔畀飲食，而且目前並冇任何枱櫈，想坐就只能坐喺草地上……
2｜水產卸賣場棟：吞拿魚拍賣場地！
離開「水產仲卸賣場棟」，會望到對面寫住「豊洲市場」嘅大樓，嗰棟就係「水產卸賣場棟」，亦即係進行吞拿魚拍賣嘅地方。提醒一下，雖然市場已經開始畀公眾進入，但吞拿魚拍賣嘅公開見學要等到2019年1月15日先有得睇！
喺入到「水產卸賣場棟」，會先經「管理設施棟」，而呢棟樓裡面有13間飲食店，包括人氣炸豬扒店「八千代」。
有見「壽司大」人龍太長，記者就趁未有超長人龍時，去試咗另一間壽司店「すし処おかめ」，點選Omakase menu，交由師傅決定壽司種類！
對「築地壽司」並冇特別情意結嘅記者，咬第一口壽司之後，瞬間就明白咗點解大家要特登走入嚟魚市場食壽司！咁高質嘅壽司，都只係￥3,600/12件（約HK$252）！
「管理設施棟」除咗食店之外，仲有一個PR區。裡面展示咗關於「築地市場」同日本魚市場嘅發展歷史，亦有關於豊洲市場嘅介紹。除此之外，PR區裡仲擺放咗一條吞拿魚模型展品，又提供牌仔等道具，畀大家影相留念。
食飽又影完相，就行入「水產卸賣場棟」參觀喇！有別於以往築地市場嘅做法，豊洲市場設計咗一層供見學專用嘅樓層，畀大家喺樓上觀看吞拿魚拍賣嘅過程。
呢個見學區域相當狹窄，窗口亦唔算大，雖未知官方會唔會限制見學入場人數，但將來打算去睇拍賣嘅大家，就建議盡早去排隊霸個好位睇喇！
3｜青果棟：蔬果批發市場
行完「水產卸賣場棟」之後，就到最後一棟「青果棟」喇！要行過去「青果棟」，就需要行番過「市場前」站方向，然後轉向右手邊天橋直行至「青果棟」。
入到大樓後，就係一條長廊，同「水產仲卸賣場棟」差唔多，唔止有關於蔬果存放、季節盛產嘅蔬果介紹，仲可以透過大玻璃望落去睇蔬果買賣嘅情況。
呢個見學樓層最特別嘅地方係，每隔一個大玻璃窗位，都會見到以唔同顏色分隔、與該顏色相應嘅蔬果命名嘅柱壁，而且用上日文、英文、中文、韓文4種語言翻譯，可見設計上有花心思。
「青果棟」除咗有得見學之外，仲係深受歡迎嘅「大和壽司」所在地！沿「青果棟」門口出嚟，行前少少就會見到一部升降機，搭落1樓後，右手邊就係店舖嘅位置。相比起「水產仲卸賣場棟」同「管理設施棟」，「青果棟」嘅店舖處於地面開揚位置，店門外排隊空間寬敞得多。
豊洲市場的交通
去豊洲市場嘅交通，除咗電車呢個選擇，都可以揀坐巴士。而今次記者帶大家睇一睇官方最推薦嘅兩條電車路線。
1｜從新橋出發前往市場前站
最方便嘅路線，就係喺新橋轉乘百合海鷗線（ゆりかもめ）。由JR新橋站嘅汐留改札口出閘，就會見到百合海鷗線嘅入站口。百合海鷗線只有一條線，唔使怕會去錯月台、搭錯車！
由新橋搭到市場前約需時35分鐘，由遠處出發嘅朋友，記得預早啲時間喇！
2｜乘地下鐵metro前往豊洲，再轉乘百合海鷗線
另一個方法就係搭地下鐵metro，對於住喺池袋、新宿等地嘅朋友嚟講相對方便，可以搭有樂町線前往豊洲，再喺豊洲站轉乘百合海鷗線到市場前站落車。
雖然由豊洲站可以徒步行過去豊洲市場，但需時約20分鐘，對唔熟路嘅遊客嚟講，唔易搵路。推薦搭到去市場前站，到站後就係前往市場嘅天橋，唔怕蕩失路之餘，仲有清晰地圖指示各大樓嘅所在地，非常方便。
總括而言，搬過豊洲嘅新市場交通方便，設計都相對乾淨明亮，但棟同棟之間有一定步行距離，想一日排2、3間食店都頗有難度，而且目前未有場外市場畀人有更多覓食選擇，同舊時位處築地相比，吸引力較薄弱。
各樓棟嘅設計雖然方便業者工作、進行買賣，但對於鍾情「築地市場」人情味嘅老顧客、遊客們嚟講，豊洲市場整體感覺就較為冷淡。擁有80多年歷史嘅「築地市場」搬遷，新市場無疑令人心生陌生感，但相信假以時日，豊洲市場都可以不輸「築地市場」嘅姿態，成為大家心中特別嘅存在。
下一頁：東京聖誕 | 迪士尼公主系列浪漫冬季燈飾
最新的日本入境要求詳情？
在入境日本前，建議先用Visit Japan Web完成一部分檢疫手續，便能更快速地入境日本，即睇使用教學，例如註冊步驟及同行家人如何填寫等，以及買定日本電話卡。
去東京有什麼好去處及景點推介？
未諗好去邊好，可以看留意東京自由行最新大行程、東京必食美食、淺草橫町美食街、東京年度拉麵店及東京蟹店推介。想去東京迪士尼的話，大可一看東京迪士尼樂園門票攻略及領取全新3大門票Pass方法。喜歡購物則可到東京Outlet；要是想過一個輕鬆的旅程，可到箱根溫泉旅館。準備到日本賞櫻花的大家，可預先一看日本櫻花花期預測。
