近日咁多平機票搶，搶埋搶埋2017已經有幾個trip 要去，如果想留返多啲彈藥食好西、買好野，識揀一定係揀平得嚟性價比高嘅酒店，總之慳得嚟都要嘆！今次揀左台北、曼谷、芭堤雅及首爾幾間3、4星酒店，mark 起佢隨時搶完機票啱使啦！
推介01 |台北 – 德立莊昆明館 ($394 起/每晚)
位於西門町嘅呢間酒店英文名叫Hotel PaPa Whale，一睇牆身有左右兩大隻鯨魚，已經成為當地地標！建築外觀以白色鍍鋅浪板營造出簡約風格，由名設計師獨特的品味將老建築改造，重新堆砌成輕工業風及SOHO都會風的空間。台北你可能去過好多次，但呢間今年先新開幕嘅型格酒店，下次去台北一定要住佢！
推介02 | 曼谷 – 素坤逸11號柑橘飯店 ($396 起/每晚)
2015年先開幕嘅呢間4星酒店走小清新路線，早餐餐廳設計好似一間文青cafe咁，連食個早餐都有個性過人。酒店仲有免費接駁車來回BTS站，但其實行過去都係10分鐘，而且成條街都好熱鬧，好多商店及餐廳，都幾目不暇給，行多幾次都唔怕悶。
推介03 | 芭堤雅 – 帕納利別墅酒店($380 起/每晚)
呢間酒店最多人讚嘅一定係佢個天台泳池！白天去就可以享受下個藍天白雲，夜晚仲可能睇到星星喎！行10分鐘就到夜市，深宵總是餓的你住呢度就啱哂啦！
推介04 |芭堤雅 – 貝特芭堤雅酒店 ($190 起/每晚)
呢間酒店走型格實用路線，無餐廳無泳池，但係好平，真係好平。距離芭堤雅海灘只係5分鐘，去步行街都只係10分鐘！ 提提你呢間酒店無電梯，如果拎大喼嘅話都要自己搬上去，不過最高都係3樓，應該難唔到你嘅另一半。
推介05 |首爾 – 乙支路高爺商業公寓($396 起/每晚)
鍾意Shopping 嘅朋友去首爾通常都鍾意住東大門，呢間實惠酒店鄰近 LOTTE FITIN，樓下就有便利店，雖然房間不算大，但部份房間可以煮食，夜晚煮下宵夜都幾正！
