北角東寶小館突被要求7日內結業 經理：30年先話違例？
昔日熱鬧非常，以氣氛和小炒聞名的北角東寶小館，就連國際巨星如「奇異博士」Benedict Cumberbatch來港時也要慕名而至。不過近日小店傳出被結業消息，節目《東張西望》亦上前報導事件，得到經理「露比哥」親述事件。現於渣華道市政大廈東寶小館最高峰時有高達8個舖位，不過近年只餘5個舖位，露比哥指食店經營30年，一直都相安無事，但於8月26日突然收到食環署通知，指其違反租用條例，要求7日內清走物品及終止合約。
北角東寶小館經理指食環署每年續約仍無發現違例問題
「唔知係咪早前有一位公眾人物嚟幫襯，畀人影到張相，當時係違反咗限聚令，所以今次食環署『要我交人』，但我都唔識佢，點交？交唔到就話我哋違例」。露比哥指，食環署在信件中提及到他因分租而違例，所以要求終止合約，惟自己30年來每年跟食環署續約都沒有問題，不解為何突然有此舉動。
北角東寶小館經理露比哥：根本唔存在分租問題
他又提到，當初是「世叔伯」提出讓他經營舖位，根本不存在「分租」的問題，又指當初知道一間公司不可同時管理8個舖位時已即時作出動作配合，「嗰陣我已經逐間拆出嚟做返商業登記、勞工保險、強積金，做完又話唔得，但明明就已經運行咗咁多年。」談到店舖要結業，他指基本上沒有問題，但員工牽涉超過二十個家庭，如何去安排生計？及後節目更表示一度聯絡食環署，但節目播映前未能得到回應。
北角東寶小館結業 網民反而拍手叫好：交咁平租賺夠啦
又一間30年老名結業，街坊亦有表示可惜，指「食環署要人走都畀個合理時限啊，得7日通知擺到明玩嘢」。不過網上亦出現另一種聲音，指「早就應該啦」。有不少曾光顧東寶小館的網民指，餐廳的質素名過於實，更指老闆「賺到笑都夠」。網民表示市政大廈的租金一向都較街外便宜，30年來以「極平租」做生意已很划算，「點解畀佢一個老細要咗五個舖位」、「違規咁多年，而家先嗌停你賺夠啦」、「食水勁深，態度只會對外國人好，好重味精，10幾年前就好食，而家完全唔得」、「5個人食5樣嘢，得個蟹係海鮮，其他小菜都要盛惠2千幾，酒樓價錢，仲要一早唔好食」。
街坊：好聽就熱鬧氣氛，講到底得個嘈字
另外亦有稱住在該區的網民指，身為街坊都未感可惜，指「好聽啲就話佢熱鬧，氣氛好，講到白咪又係嘈到死，霸晒成半個場以為佢開緊Party」、「佢哋晚晚瘋狂爆機，嘈住其他食肆，根本非常過份。我就覺得其他檔主好慘」、「其實已經變咗佢哋地頭咁，老闆當正係自己舞台，又飛筷子又剩，對其他人其實唔公平」、「個環境又污糟，食環署咁遲先做嘢應該要畀人鬧」。
