山系品牌 Patagonia 銅鑼灣新店

秋風陣陣，又係行山郊遊好時節，或者冬天去外地滑雪遠足，更加要買定山系 gear 做足準備！戶外品牌 Patagonia 銅鑼灣分店剛剛由時代廣場搬去白沙道，跟同一條街的Columbia 打對台！這間港島區最大地舖，裝潢同其他分店如出一轍，只係新張期間多了一幅歷史牆介紹品牌及歷史。我哋參與了上星期的新店開幕派對，現場有 live band、即影即有機、免費紋身貼紙等等，氣氛好熱鬧，當日仲有 85 折優惠，好多人滿載而歸！

雖然 Patagonia 分店限定貨品欠奉，不過肯定最齊全，男女童裝的新款及熱賣款式都有，公關話今年品牌特別著重女裝，啱晒一眾 yama girl。特別推介今季推出以 55% 循環再造物料 PrimaLoft Gold Insulation Eco 製作的 Nano Puff 系列，環保之餘又夠功能性。招牌作 Retro-X 抓毛背心、木村著用的經典 Snap-T、layering 必備的 Capilene 保暖底衫等等，暫時齊款齊碼。買滿$3,000送不銹鋼水樽，復古設計型格實用，送完即止，趁機入貨喇！