凱施餅店或現結業危機 被指拖欠580名員工薪金：強積金都無供76萬
凱施餅店近日被指出現結業危機，觀眾謝先生向《東張西望》爆料，指他工作的連鎖餅店年頭開始延遲出糧，由拖延兩星期到兩個月不等，員工因為擔心老闆隨時「走佬結業」，要面臨失業加欠薪兩大困境。加上早前Crostini突然結業一事令到員工都十分擔心有類似的情況出現，因而希望獲得公眾關注事件。
員工爆料：年頭開始拖糧 但只發生於廠房生產部門
謝先生在《東張西望》中表示，由年頭開始，拖糧的情況越趨頻密，而當中試過拖糧達3個月。他指「以前都試過間中出糧唔準時，但後尾真係越嚟越誇張，超過一個月都試過，但又唔係個個部門都有呢個情況出現，前線員工同物流運輸部門多數可以準時出糧，只係廠房生產部門就拖得好明顯。而且年資越深就拖得越耐，我就覺得好不安啦，之前有同事直接向上司問，問完先有機會出糧。」然而，謝先生本人亦聯絡勞工處備案，節目中亦透露嘗試聯絡店方，但節目播出前都沒有得到回覆。
凱施餅店營運30年不敵疫情 網民：其實係敵不過對手
90年代才轉營為餅店的凱施，最高峰時高達50間，30年後變得「糧都出唔到」，有網民分析凱施餅店因為對手太多而引致結業：「頂級既Gontran Cherrier同Bakehouse嗰啲咪又係咁多人排隊，好似唔使錢咁」、「市面上有太多種類的面飽，又有湯種、又bagal嗰啲，點同人哋爭？」。又有網民認為是其店面的衛生情況令到人卻步：「個店面太污糟，啲燈又暗」、「幾年前見過佢地運輸好污糟，從此永不再食」。
有網民亦都為此而感到可惜，事關凱施品質味道符合價錢，又指：「佢個咩沙律卷幾好食」、「辣肉鬆包世一」、「連鎖店最好食嘅菠蘿油就係凱施，同店員熟夜晚仲可以即場整畀你」、「店員仲有冇菠蘿油，佢二話不說幫我拎個包開邊再塞舊大牛油，好warm」
工聯會表示關注事件：盼盡快解決
凱施餅店拖糧事件被揭發後，工聯會前日發關注聲明，並指已於餅店聯絡，希望短期內可以解決欠薪事宜。
