1月18日更新：票價船期出爐，仲有首航優惠
近近地嚟講，澳門一直都係香港人週末遊嘅頭幾個選擇。不過對於新界嘅朋友，下下都要去上環或者尖沙咀搭船其實都幾麻煩，不過好快大家就多個新選擇：就係由屯門坐噴射飛航去澳門啦！
有咗新航線，咁新界嘅朋友就算搭夜船，之後搭的士返屋企車錢都冇咁甘啦！
1) 唔係一早有啦咩？宜家開返有咩唔同？
唔知大家仲有冇印象，其實早喺2011年西北航運已經有屯門去澳門呢條線，不過因為航程耐、人流太少所以喺2012年就停咗。宜家開返，最大嘅分別就係今次用噴射飛航，速度當然會快好多啦！
2) 咁要搭幾耐？船飛又幾錢？
根據船公司早前發放嘅新聞稿所講，往返屯門及澳門的航線，航程僅需約 35 至 40 分鐘！
票價方面似乎唔多著數，TurboJet喺留言區回應「票價跟港澳線相同」，但就加收$28碼頭服務費；今次官方就宣稱會「推出船票優惠」，有興趣嘅朋友要等下啦！
新界居民點睇？
班次唔多，除非你直接住喺屯門碼頭附近，否則吸引力都唔算太，有元朗網民就以用家角度表示「寧願搭968出上環，一落車就係港澳碼頭，唔塞車只係35分鐘。去屯門要搭西鐵轉輕鐵就一世紀咁耐、輕鐵仲好臭添！」（1月19日更新）亦有網民強烈反對並爆粗表示：「元朗搭輕鐵由頭搭到落尾起碼頭都唔會耐得過搭968出上環啦！」並指斥輕鐵臭唔過地鐵，將討論轉移咗去味覺層次，非常有趣；不過整體而言，屯門居民都表示歡迎，期待加密班次之餘，仲好想撲到平船票過大海！