香港紋身展開鑼！｜90後少女紋身師：紋身應來自故事

2016香港國際紋身展終於開鑼喇！說起紋身，十年前腦內或會泛起港產電影內蠱惑仔「左青龍、右白虎」的印象。但到了這個時代，紋身已經漸從禁忌中走出來，更從一種表皮上的裝飾演變過來。這位90後本土女紋身師，代表著刺青文化新的一章，撇開盲目追尋潮流，講究的，是圖畫背後意義與存在的故事。

撰文：bu｜圖案：Woody、受訪者提供

紋身不只是潮流更有它的存在意義和背後故事

「經過痛楚，將一件事、一句說話刻喺身上，每一次照鏡，每一次望到，都係一次提醒，提醒自己跟住要go for乜嘢。用呢個方式去感受，同畫畫、文字記錄截然不同。」馬珈珈，GaGa，現職廣告從業員，她亦是一位紋身師。其手下圖案細膩精緻，線條簡潔有力，設計偏愛配以dot work形式表達，吸引的客人多以女生為主。她認為紋身並非僅為一個圖案，也非只是一個潮流。「紋身應該係意義上嘅載體，每個人嘅紋身應該有屬於自己嘅故事，或者有佢嘅concept喺入面。」

中國傳統中，紋身是犯人、蠱惑仔、奸角的標誌，予女生更有青樓意味。香港，不乏愛紋身的女孩，反比以往受盡白眼的年代，今天擁有紋身的女生，更顯出剛強獨立的個性。「我覺得有紋身嘅女仔，某程度上係比較open-minded，敢於表達自己個性，呢件事好值得欣賞。」

未有紋身　先學幫人紋身　

GaGa自小就鍾愛繪畫，對紋身也特別有情意結。數年前，她「膽粗粗」往碧咸也光顧的香港著名紋身店Freedom Tattoo拜師學藝。對她來說，紋身槍，宛如另一種畫筆，人皮則是她的一張畫紙。然而，GaGa執起紋身槍前，身上卻一個紋身也沒有。「師傅都覺好笑話：『咦！好少有未紋過就走嚟學。』因為我好堅持紋身要有佢嘅意義，我想諗得清清楚楚，要搵到一個適合我、可以表達到我諗咩嘅圖案，同搵啱artist先去紋。」

紋身師有一份使命感

「我會問清楚佢呢個紋身背後有咩故事、意義，從而同佢構思一個獨特、新嘅構圖，而唔係做一啲罐頭式出產嘅紋身，我覺得每個人身上嘅紋身，都應該要專屬於佢自己，先至有呢個紋身嘅存在意義。」GaGa對每一位找上她的客人，自覺抱著一份使命感。「曾經有一位熱中參與社運嘅女仔嚟搵我紋一支手槍同『Fearless』呢組字，佢話要提醒自己，就算面對警察攞支槍指住佢個頭，都要無畏懼堅持信念。我覺得除咗幫佢記錄呢件事，仲好似有份參與同體驗呢份理念。」

小清新紋身　注意淺色會甩色！

早前興起星球系列紋身，身邊不乏朋友隨隨便便就紋到身上去，只因覺「好靚」。篤信紋身出自故事的GaGa坦言，最怕這樣的客人。「對於搵我紋一啲trendy圖案嘅客人，我都會叫佢諗清楚啲先。」而近年大熱的韓式小清新紋身，線條及圖案簡單為主，運用的顏色柔和，她形容這款紋身較正面，對初接觸紋身的女生來說，也較「易入口」。可是她卻認為圖案範圍太小，難以具體表達背後故事與含義。另外她提點，由於小清新紋身採以較淡的顏色，如黃色、青綠色等，紋身後數星期內會出現脫色的情況，通常都要補色，要有周而復始進行後期保護的心理準備。