學生讓關愛座仍被大叔責罵
有網民於Facebook分享，朝早搭車返工時，除了前排兩個關愛座之外就坐滿人。後來有個背住書包的學生上車，樓主指：「眼見書包重量唔輕，可能佢只坐幾個站，而當時又無有需要嘅人要坐，佢就坐在關愛座外面的位置。」
樓主稱巴士駛到下個站，有幾名乘客同中年男人上車，學生哥即時起身企在近落車門口，點知中年男人依然唔放過個學生，大聲話：「你坐㗎咩！呢個係關愛座，唔係畀你坐，你有無我咁大年紀啊？」
車長開聲：個位人人都可以坐
樓主續指中年男人繼續鬧個學生時，車長突然講：「個位人人都可以坐。」點知男人話：「呢個係關愛座。」車長又再回應：「關愛座係優先讓畀有需要嘅人，無寫你個名，唔一定係你坐。」最終男人無聲出。
網民：車長好Man！
網民對呢件事就有以下回應，指關愛座應該取消，並話個男人見到對方係學生先夠膽恰！當然車長為學生解窘的行為亦獲得網民大讚，學生主動讓座的行為亦令網民認為他是有禮的年輕人，如果真的有需要，其實該名學生是可以不用讓座的。
九巴：有需要就可以坐 ！
九巴亦於facebook出文表示「關愛座有需要就可以坐」，更指出關愛座的原意是要讓給有需要的人坐，不論是身體不適、長者、孕婦、抑或殘障人士等等，每個人都會有身體不舒服想休息的時候，即使肉眼看似健康亦不代表他沒有需要，如果當時沒有其他有需要的人就坐，大家都可以坐的！
