房客化身偵探查出職員講大話 網民：一萬蚊點夠賠
有酒店房客日前向Facebook專頁「西店Hi客之道 Hispitality Secret」投稿，指自己與女朋友在酒店Staycation時，希望能夠盡快浸浴，於是在浴室放水，然後落街買外賣。由於事主知道地台有去水位，所以放心離開。但一小時回到酒店後，發現房間水浸，甚至影響到附近的房客。因此，酒店職員要求事主賠償，不過事主再了解事件後發現職員有講大話誣蔑他的嫌疑，令他對酒店失去信任。
事主浴室放水一小時 網民：樓主準備去泳池？
事主雖然在離開前有檢查過地台有去水位，不過放足一小時的水，的確有機會去唔切水，造成房間水浸。網民表示：「放水成粒鐘覺得有去水位就無問題？」、「水費唔使你畀都唔好咁折墮啦」、「本身放緊水就唔應該出去啦」、「開一個鐘水你係咪開緊游泳池」、「正常浴缸放10分鐘水都夠」。
酒店水浸影響其他房客 交涉後賠償$1萬
職員指由於水浸情況嚴重，溢出走廊，令到周遭的房客受影響，有客人為此作出投訴，酒店需要為4戶客人重新安排房間；又指地板是木製，所以水浸會造成地板發霉、蛀蟲等情況出現，於是要求賠償$30,000，但經交涉後雙方同意賠償$10,000即可，事主亦於當晚立即賠償。
事主私下查證驚現職員講大話？
事發翌日，事主心有不甘之下，決定化身偵探自己調查真相。
疑點一、其他房客沒有投訴
事主翌日早上向對面房查詢，對面房是第一個通知酒店的人，而他表示：「只係門口濕咗少少，無投訴同中間無調房」； 而斜對面房的房客表示：「6點check-in後都沒有中途換房」，意指房間內沒有受影響，可以繼續使用。
疑點二、地板是石屎地，並非木製地板
事主再次檢查後發現酒店房內、房外以及地氈下都是石屎地，並非職員所指的木地板，不構成「地板發霉」問題。
疑點三、地台去水有問題
事主更測試房間地台的去水系統，將地台去水口及企缸去水口尺寸一樣，按理去水能力應該亦一樣。不過測試後企缸去水能力正常，但地台去水明顯較慢，導致有水溢出。
網民：職員俾個落台階你姐
網民看到事件都認為：「同意事主報警，因為一萬蚊真係幫唔到酒店裝修執返漏水條數」 、「通常浴室係會做防水，但係其他室內唔會做，你浸水係會漏落下一層變水舞間」、「浴室個去水唔係萬能，係預清潔或者倒瀉等少水量去水，keep住開去一定去唔切」、「整到人哋水浸… 係咪都要賠錢啦！人哋同你講個make sense啲嘅理由， 等大家容易落台啫」、「水費、清理費、風機唔洗用電？ 要唔要電費？ 清理期間浪費嘅人力資源會唔會生產到其他野？1萬蚊點夠埋單！」等大量批評事主的留言。
