撰文：GOtrip 編輯部｜圖片來源：新傳媒資料庫
酒店工作大小事
今次 GOtrip 編輯部訪問了一位曾在不同星級酒店工作，約有 6 年經驗的 酒店員工 M 小姐，跟大家分享她的打工經歷，以及從同事口中熱傳的酒店工作大小事，當中不乏一些「搲著數」、古怪的住客。「有時回想起，都不知好嬲定好笑！」希望大家明白， 酒店員工工作真的不容易，以後請禮貌對待他們吧！
1. 保險箱＝微波爐？
已經不是第一次聽過有客人把保險箱當成是微波爐用了！早前有 blogger 分享，一位婆婆把魚柳包放進保險箱想加熱，想不到這次更誇張。以下是M小姐與客人的對話：
「客人打電話到櫃枱 reception（聽聲音為操普通話的中年人）－－
客：小妹 ，打不開，裡面的東西被鎖住了……
M：是保險箱嗎？你剛才按了甚麼數字？重複再按便行。
客：我哪有按？我的東西現在拿不出來。
M：現在上來幫你開。
Call 保安上去一開，見到有隻碗，仲有一包鹽焗雞喺個保險箱裡面！
M：這不是冰箱、微波爐，是保險箱啊！
客：謝謝小妹，這個太難操作。」
2. 中東阿拉伯「鑽石級鹹濕佬」的撩妹技巧
做酒店前台常會接觸到不同國籍的有錢人，M小姐也曾遇過，結果當然沒有理會，但被望著工作也會很不自在吧！
「遇過中東阿拉伯鑽石級鹹濕佬狂追，因為佢想喺香港娶個老婆，成日都約我去睇夜景，日日落嚟大堂企喺你前面，雙手托頭望住你做嘢。」
3. 奧巴馬老婆＝奧太？
M小姐指，做了那麼多年，遇到過不少奇怪的客人，有些以為自己是大人物，其實是白撞！以下是其中一個經典例子：
「試過有個香港女住客，凶神惡煞咁行埋嚟 reception 度問：『知唔知我係邊個？』
我心諗梗係唔知：『有咩幫到你呀小姐？』
小姐：『唔好叫我做小姐，叫我奧太，我老公係奧巴馬。』
之後佢一個月有幾日得閒就過嚟，問：『我老公今日有冇喺你哋 conference room 度開會？』」
可怕！
4. 躁客無禮掉通行證？自己執！
沒有禮貌的客人最討厭！你有錢入住酒店，不代表可以無禮對待員工。M小姐初入行時，就曾遇過一個超無禮的客人。
「有次排晒長龍，嗰條龍好長，長到有 40-50 人等 check-in，企隊頭有個大陸男人，一本通行證飛埋嚟我度，嗰陣都講緊係初入行，我又唔識 handle，惟有問佢：『你要唔要番本證件？（要就）自己執！』」
5. 名人熟客唔見鑽戒 原來喺佢自己身
酒店員工常會遇到有客人不見了/漏了東西，M小姐指，最多人遺漏的是「銀包、證件、衫褲鞋襪」之類。試過有次有個阿婆漏咗一棚假牙、有人漏咗啲要放入雪櫃嘅藥、人奶等等，試過連假髮都有，最記得是以下的case。
「有個女人（都算知名人士）嚟到我哋酒店住，佢嚟過好多次，次次都係嗰間房，今次嚟玩嘢話間房唔舒服好臭，咁即刻 upgrade 轉房啦！熟客嘛！
轉完房到 checkout 就話自己唔見咗粒鑽戒。舊嗰間房成晚冇新客住，咁我哋都放佢返入舊房畀佢搵，當然搵唔到，就報晒警，後尾發現原來隻鑽戒一直都喺佢自己身上…..」
6. 最麻煩港客：「我每個月都會嚟住，嚟折磨你哋！」
M小姐提到，自己見過的客人當中，「最難頂的就是香港人，寧願對怪客，都好過對搲著數嘅港客」，可能因為同聲同氣，所以特別有霸氣吧！她也跟我們分享了一個因為自己早到而想搲著數的港客：「試過有位香港男住客，早上 7:00 話想 check-in，但佢間房其實有個客仲住緊，加上 check-in 時間係下午兩點，晨早冇房好正常呀！跟住就無啦啦搲個 free breakfast，佢話咁早嚟到冇食早餐……」
除了搲早餐，想搲升上豪華房的客人也不少。
「又有次有個男人，指明嗰間房未 ready好，好似因為有工程定壞咗唔知乜嘢，叫佢住第二間。佢住落之後轉咗成 5 次房，次次都有唔滿意嘅地方，我哋都怕咗佢。最後畀咗間好大、兩層複式套房佢先收手。事後仲同我哋講：『我唔係嚟搲著數，係你哋酒店嘅房間真係太有問題我先轉（但其實可能只係某個燈掣甩咗少少色、洗手間盞燈暗咗少少），我話畀你哋班人知，我每個月都會嚟住，嚟折磨你哋！』」M小姐想起仍深深不忿：「最後佢真係每個月都嚟住，我哋一定前一晚 make sure 佢原先要嗰間房冇任何工程，同埋唔畀其他人住。」
7. 鹹濕佬防不勝防
M小姐時不時也要上通宵班，她指：「通宵更接電話最多，通常是投訴隔籬房對情侶嘈。」另外也特別容易接到變態電話。
「我接過變態電話。開頭打嚟問你關於酒店嘅嘢，後尾問女同事有幾多個、係咪著緊黑色絲襪。
又有次有個男人扮我哋分店同事，一直都話估下佢係邊個，是但講個名佢就話係，跟住傾傾下講鹹濕嘢。」
編按：看完 M 小姐分享的7個故事後，就感到 酒店員工的工作真的不簡單，所以大家也要尊重從事服務業的朋友啊！M小姐最後還給了大家一些小提示，如果想得到較好的房間和服務，就要記得：
狂搲嘢、態度差、冇禮貌，就會給他一些不太好的房間！
有禮貌、通常唔出聲的客人，我都會畀好啲嘅酒店房佢。
服務業就係咁， 我咁有禮貌對你，唔該你都唔好西口西面！
