太平洋接壤點 ── 西貢東壩！東壩雖然山卡啦（離北潭涌10公里），但西貢的士可直達，靚景遠在天邊即變近在眼前矣！ 西貢 萬宜水庫 有兩條堤壩，均由工字形巨石墩築成，其中「東壩」集水區不但建築宏偉，更蘊藏大秘寶，已被列為香港地質公園最重要的考察點。其四周被億年火山岩包圍，數千座S 形石柱早過恐龍出世，1億4,000萬年前已經存在！景點一不離二三四，堤壩盡頭的破邊洲、海蝕洞、20分鐘步程的隱世沙灘浪茄通通大有睇頭，just follow me！

撰文、圖片：新傳媒資料室

億年石柱「壩氣」絕景

白堊紀火山爆發後， 熔岩冷卻收縮，變成S形或傾斜的六角形石柱，高30米，厚約400米，勁壯觀。

斜紋海蝕洞

斜紋火山岩crossover風化海蝕洞咁罕見，突擊隊員不理告示牌勸喻，怒澗水入洞探險！

殺人deep V

大自然力量把破邊洲劈為兩半，大deep V石柱陣，氣勢磅礡。至今仍為人津津樂道的爛片王《殺人犯》都在此取景，拍下唯一不太爛的打鬥場面！

大起錨

工字石墩又像錨，遠看細過粒骰，實際奇大無比，爬上去有啲危，要當心！

再遇山楂樹？

集水區竟似《山楂樹之戀》電影場景，「湖」水清澈見底，好純愛！

從深藍隧進碧綠

暫别天上藍，去找一片綠。從東壩步上麥理浩徑，朝浪茄沙灘出發。10分鐘，繞過奶綠色的水塘；20分鐘， 越過翠綠色山嶺，到達海邊。陽光穿透碧綠海水，近岸沙石層次分明，你潛入水底，依然被我看見。浪茄，我們來了！

無人之境自己執生

圍住東壩行一圈要30分鐘，除了涼亭一個，全程冇遮掩，烈日下隨時變燒豬，因此防曬用品不可少。而東壩至浪茄沿途亦沒有任何補給站，記得準備充足糧水！

東壩・浪茄

往東壩交通：
1. 西貢市中心乘綠色的士直達，約$115
2. 鑽石山乘巴士96R（$18.7）或西貢乘巴士94（$6.8）往北潭涌，再步行2.5小時至東壩

往浪茄交通：
1. 到達東壩後，沿麥理浩徑步行20分鐘
2.西貢碼頭預約快艇直達浪茄沙灘


Tags :