網上「行山人有三急」 嘅討論，由2004年（香港行山網：hiking.com.hk ） 到 2014年（香港討論區：discuss.com.hk）都有好多，其中真係有好多唔同角度唔同態度，而有一句不得不認同：「一個問題可以講足三年，都算冇得頂了。其實行山遇到 人有三急 是正常，因全日在山嶺間，始終有此需要，長期行山的人士，都識做的了，只要不妨礙他人，注重公眾衛生，不污染水源，就當作施肥。當然如果忍得，最好忍到有公廁才去方便，就功德無量了。」
撰文：陳Wing@搞乜東東
大東山爛頭營後方位置變廁所！
上星期日（1月8日）的「還原大東聯合山野清潔活動」，執到大量不負責任的人們留下嘅垃圾（仲有根本唔係垃圾嘅帳篷），令人心痛、無奈、憤怒、百感交集，令大家思考早前瘋傳大帽山垃圾片段中女仔所講：「點解可以接受自己道德底線去到咁低？」山友都慨嘆，爛頭營的隱蔽或後方位置，全部被迫變成廁所。行唔行開山嘅人，都應該知道山上並唔會設立廁所，咁又返到去呢個問題——行山時人有三急點算好？
無痕山林理論－開「貓洞」就最好？
我和朋友都習慣帶定膠袋和夾，邊行邊執垃圾，沿路有不少紙巾、膠袋、包裝，休息位置更有大量紙巾或濕紙，最恐怖就係入到比較隱蔽的位置，會見到一片白色「紙巾海」，亦曾執到黏附大便的紙巾、用過的衛生巾……大小二便係人類基本的生理需求，山友間都經常討論，應該如何做到方便自己，又盡量無痕，解決方法唔通係用無痕山林理論開「貓洞」？當然我唔敢話呢個方法100%啱，試想像喺爛頭營旁邊開「貓洞」——以近年嘅人流我真係唔敢想像，好多山友都話：「山頭小便梗係就地㗎啦！」我會建議出發前可帶定多個膠袋或紙袋以備不時之需，途中無論任何大小形式製造出來嘅垃圾，都掉入袋內帶走，仲可以順便沿途執埋垃圾，然後麻煩紮好呢幾袋嘢，帶返出市區先好丟棄或分類。
去行山，自己垃圾自己帶走當然要做，仲可以做多步：以不製造多餘垃圾為大前提。
保護大自然：山都有三急
山急：想大家多思考如何好好保護它
山急：令大家寧靜和動物雀鳥好好相處
山急：想大家出發前喺日常生活多思考準備
走在山上，最震憾的從來不是甚麼芒草、甚麼秘景。更觸動人的，其實是山間遇上的人和事。一個山，將本來毫不相干的你和我，連在一起。只希望，每一個人也懂得愛護這個山野。多麼卑微的願望。
