【 10 大必遊點第 01 講 – 荔園城堡】
以前去荔園，一落車已急不及待衝向呢座童話味濃嘅城堡，而牆身上笑容滿面嘅白兔同老虎更成為荔園其中之icon！「荔園Super Summer 2015」將百份百保留呢個特色，離遠望見已感受到樂園歡樂氣氛，遊人通過堡壘式大門，就可以重遊童年舊地，展開經典旅程。大家記得喺城堡前拍照留念，影完相先入場玩呀～
【 10 大必遊點第 02 講 – 吹漲動物園】
當年荔園動物園非常架勢，獅子、老虎、駱駝、長頸鹿、鱷魚等，令人大開眼界！「荔園Super Summer 2015」用上超過60,000個環保物料汽球製作出數十款動物，加上一系列動物造型彈床，打造全港首個大型氣球動物樂園，歡迎大家一齊黎參加吹漲嘉年華！
【 10 大必遊點第 03 講 – 吸蕉大笨象】
出自荔園嘅大明星有好多，但佢必定係最叫人難忘嘅其中一位～ 1952年，12歲嘅Tino跟隨沈常福馬戲團由泰國來港表演，後來馬戲團宣佈破產，資金不足令Tino無法返回原居地。幸得荔園收留，更得到遊人們寵愛，每日可嘆新鮮水果直至1989年因急性肺炎去世。「荔園Super Summer 2015」Tino將化身成機械大象，大家可同佢繼續互動，餵佢食香蕉，佢會做出令人驚喜萬分嘅反應㗎！
【 10 大必遊點第 04 講 – 滑稽恐龍屋】
《侏羅紀公園》令恐龍屋成為荔園一個焦點，參觀期間踩中隱藏感應器時，就會出現閃燈同埋傳黎恐龍叫聲。「荔園Super Summer 2015」全新恐龍屋足足有十米高，恐龍尾變成有兩層樓高嘅旋轉滑梯，以滑稽取代恐怖，刺激度十足！
【
【 10 大必遊點第 05 講 – 經典掟階磚】
荔園有咩攤位遊戲？相信大家會即時諗起「掟階磚贏香口膠」，大大塊白箭招牌裝飾已成為荔園最令人難忘之畫面！呢項經典攤位遊戲今次當然唔少得，玩法一樣，獎品除左香口膠之外，仲有好多驚喜禮物，掟階磚贏返嚟係特別唔同啲！
下一頁：仲有夏日透心涼嘅冰場 & 鬼屋…
【 10 大必遊點第 06 講 – 荔園大舞台】
仲記得梅姐梅艶芳同梅愛芳兩姊妹喺呢個大舞台展開璀璨星途嗎？仲有好多本土樂壇同影壇巨星都曾經喺度演出過！全新荔園大舞台同樣星光熠熠，除咗源源送上經典好歌，更有兒童表演、講座及工作坊，欣賞表現同時亦有機會參與演出！
【 10 大必遊點第 07 講 – 夏日溜冰場】
當年荔園首個真雪溜冰場，係不少熱戀情侶嘅約會聖地，踩住冰拍拖係幾咁浪漫～「荔園Super Summer 2015」決定將溜冰場重置，炎炎夏日為大家帶來消暑好去處！佔地約200平方米，設有四款趣致可愛嘅溜冰輔助器，不諳溜冰者亦可以享受箇中趣味。唔知有幾多愛情故事會喺呢度再次發生呢？
【 10 大必遊點第 08 講 – 好時光收集箱】
昔日荔園片段同文物一一收納在此！「光影區」內舊日香江衣、食、玩、行重現眼前；「藝術區」則展出本地藝術家嘅作品，主題圍繞香港文化。另設有「Xbox One激Fun遊園地」，同場更會推出全新「Xbox One X 荔園別注版主機」，絕對係樂園必到之地！
【 10 大必遊點第 09 講 – 淘氣小木馬】
旋轉木馬一直係樂園必備之物，以往於荔園亦大受歡迎。「荔園Super Summer 2015」當然都為此經典遊戲留一席位，更以元祖款式作為設計藍本，坐上小木馬，不論年齡都童真再現～
【 10 大必遊點第 10 講 – 魔靈小學】
當年荔園嘅「神秘寶洞」創下互動鬼屋先河，已令不少遊人嚇破膽。「荔園Super Summer 2015」決定將鬼屋驚嚇指數倍增，以本地一間荒廢小學鬼故為藍本，設置地下大堂、走廊、洗手間及課室場景，到處充滿驚嚇元素，再配合「魔靈小學」app，驚悚指數創新高！