荔園遊樂場去年暑假以期間限定方式，選址中環新海濱舉行「荔園Super Summer」，為期70日的嘉年華為大家帶來不少集體回憶，據消息透露，2016暑假，荔園又會返嚟喇！
荔園Super Summer 2016 夏日回歸 場地改去博覽館
綜合各大收風單位消息，「 荔園Super Summer 」繼續喺暑假舉行，據知因為中環海濱檔期較密，有可能移師大嶼山亞洲博覽館，懷舊的恐龍屋、大象Tino和叮叮船預料會都保留，還有掟階磚贏香口膠玩意。不過活動細節，就要等荔園主席邱達根（Duncan）於5月23日（星期一）的發布會，才知道詳情。
網上流出 恐龍截肢移送畫面！
消息透露，2016 招牌大象「天奴」將會再次以機械象現身，至於地標式的恐龍，近日亦再度出土，網民Reno Fung日前在香港馬路發現一架貨車運載一隻恐龍腳，影相貼到網上，仲揚言「有人殺咗隻恐龍啊！」，精明眼網民一眼就認得出係「恐龍屋」的鳳爪！
2015回顧：免費入場 人流高達120萬
去年的「荔園Super Summer」歷時70日，閉幕日更錄得高達6萬人次，累積近120萬人次入場，當時主辦單位指「未能收回成本」，是否再「回歸」需要再研究。
舊年幾時開幕？活動長達70日！
去年在中環舉行的「荔園Super Summer」在6月27日開幕，閉幕日期在9月4日，橫跨整個暑假！當時仲有好多召換集體回憶的家庭照片比賽活動，你有無參加過呢？
GOtrip編輯點評：2016 暑假正值選舉季節，如果今年「荔園Super Summer」再搵689做主禮嘉賓，你估到時場面會唔會好「熱鬧」、大象天奴仲畀唔畀掟黃蕉餵飼呢？
