採訪及撰文：黃潔欣、黎潤詩、蕭凱欣、北向惠理 | 攝影及圖片：《新假期》攝影組、新傳媒資料室、有關機構 （原文刊於 882 期《新假期周刊》）
01 | 必食港味豆品〡興記荳品
掃街當然要撐本土，食港式小食，豆腐花、缽仔糕就夠晒港人回憶。不過在士林食街食豆腐花，就一定要食這家，因為識食豆腐花一定係食豆味，而且豆花撞得夠滑。
除了普通豆腐花，加$9 仲有喳咋豆腐花揀。
興記荳品
地址： 荃灣路德圍荃興徑 31 號地下
營業時間：11:00am-10:30pm
02 | 創意雞蛋仔進駐〡Eat With Me
香港必食小吃雞蛋仔可以話係吐氣揚眉，因為連韓國創意小食都要加入雞蛋仔，香港又點會執輸呢？這間雞蛋仔專門店，口味眾多，仲大份到可以當正餐，配肉醬、配咖喱，不得不佩服店家創意十足。不過夏日炎炎，最受歡迎都是雪糕雞蛋仔，以造型花巧見稱，可配上麻雀形糖餅、大大粒烤棉花糖等。
外層脆口，裡面則呈鮮黃色，細密濕潤鬆軟，蛋香夠出。
有輕輕烤過的棉花糖煙煙韌韌，配上雪糕、忌廉和朱古力醬，再加上雞蛋仔，極飽肚。
Eat With Me
地址：荃灣四陂坊 12 號雅緻樓地下 D 舖
營業時間：12:00nn-10pm
03 | 台灣直送〡鮮芋亭
六年前開業的連鎖台式甜品店，現與豪大大雞排共同經營，老闆於台灣九份一間小店吃過芋圓後念念不忘，最終以誠意打動店主，從台灣直送手造芋圓到港。基底可選仙草凍或豆花。
仙草凍滑嘟嘟，味甜帶甘，入口溶化； 紅豆和綠豆均有起沙， 前者香甜，後者清香，亦冇草青怪味，拍得住台灣水準。
色澤鮮艷，大大粒，相對厚身方正；咬落彈性十足，中間質感軟糯，味道尚可，尾段隱約嚼到芋香及番薯香。
以仙草汁和蜜紅豆的甜味代替糖水，令整體甜度適中，不會過分甜膩。
鮮芋亭
地址：荃灣大河道 22-28 號榮安大廈地舖
營業時間：10:00am-12:00mn
04 | 嚴選山政小山園抹茶〡Ideas Dessert
抹茶是港男港女近年大熱的食品，吃甚麼都會加上抹茶，尤其是甜品。坊間亦開了很多抹茶甜品店，但好多都是用平價貨，有幾多個是用真．抹茶呢？而這間小店就不惜成本選用京都百年老店山政小山園抹茶來做甜品，特點是茶味夠濃，吃完還帶點回甘。甜品款式港西日台合璧，既有軟雪糕、沙冰、刨冰，也有心太軟和Tiramisu 等等，而且價格仲非常實惠，每款都平過出面成$10-$20。
芭菲以藍莓、士多啤梨、粟米片及忌廉組成，主角是Milk Top紫薯雪糕，消暑佳品。
有抹茶雪糕、白玉及紅豆外，還有自家製的軟滑豆腐花在中間。
鮮打紫薯蓉飲落陣陣紫薯香，顏色亦很呃like。
除抹茶外，近來大熱的紫薯甜品都有！心太軟流心效果一流，紫薯味足。
刨冰上有大大粒的台灣紅豆、煙韌的白玉及椰果，還有以京都百年老店山政小山園抹茶及北海道 3.6 牛奶製成的抹茶雪糕，消暑一流！
Ideas Dessert
地址：荃灣荃貴街 10A 富麗花園商場A 座地下 13B 及15號舖
營業時間：星期一至五 3:00pm-12:30am，星期六、日及公眾假期1:00pm-1:00am
05 | 意式創意雪糕店〡Icecream Brothers
採用意式手法製作雪糕，口感黏黏的，相對亦少脂肪，而水果口味雪糕更堅持以新鮮水果製作，天然又較健康！每日提供 10 種雪糕口味選擇，除可單點雪糕外，主打的創意雪糕甜品，配搭更見心思，店主特別推介岩鹽雙重芝士雪糕班戟和棉花糖雪糕窩夫；另外還有岩鹽芝士雪糕撻、朱古力雪糕泡芙、金莎脆皮朱古力雪糕、木糠芝士雪糕等特色選擇，愛嘗新口味的你，不妨一試！
在曲奇味雪糕上，放上即焗小班戟、法國總統芝士和南非岩鹽，配搭新鮮，味道意外地夾！
即叫即焗，棉花糖烘得外脆內軟，窩夫又夠香口，可配搭兩球自選雪糕，集冷熱交織的口感。
心太軟的流心度高，朱古力漿味道香濃，同樣伴兩球自選雪糕。另有新出的抹茶心太軟。
Icecream Brothers
地址：荃灣大河道 18 號地皇廣場 1 樓 105 號舖
營業時間：1:00pm-9:30pm