港男帶$20食澳牛 埋單發現唔夠錢超淆底：「唔通要挑戰澳牛底線？」
最近有網民在「香港茶餐廳及美食關注組」分享在澳牛動魄驚心的經歷，事主指自己近日到澳牛食早餐時，「到埋單嗰下先發現銀包唔夠錢，搵勻全身都係得一張$10紙同幾個神沙，夾埋仲要唔夠廿蚊」。此時事主已心感不妙，「死啦，點算，唔通今次要挑戰澳牛底線，雖然澳牛哥哥平時好細心，但食完嘢無錢畀就唔係咁計」。
只收現金的澳牛，面對住沒有現金的事主，會否特別「扯火」？答案是：沒有。事主指當時打硬著頭皮問收銀姐姐「有無PayMe」，問口講了句：「唔好意思」，話口未完，姐姐已跟他說：「得啦，去撳機啦」。事主當堂表示「澳牛真係好有人情味，仲要無叫我留低任何貴重物品做保證，完全係講個信字」。
網民質疑吹水歌頌：今時今日無現金都有八達通，用咩PayMe？你當我們傻的嗎？
不過有網民指「我感覺你是吹水，今時今日喺香港無現金都應該有八達通，還用什麼pay me，你當我們全部都是儍的？簡直是吹水唔抹咀」，言論隨即惹來過百留言反擊，網民紛指「你真係唔識㗎喎，一間食肆收現金，好出奇？開左幾10年，從來都係收現金，你自己冇去就話人吹水」、「唔止澳牛，我樓下茶餐廳都係只收現金喎」、「好多都仲係只收現金唔收其他，新景園係其中一間」。
自從無咗班「大陸客」，佢哋態度真係好咗好多
澳牛哥哥曾表示「唔係惡，只係大聲」，指餐廳要「光速」才可應付大量客源，指「入面慢慢坐，出面就有排排，想快啲搞掂條人龍啫」。有網民分享指自從遊客大幅減少，澳牛哥哥已經「收咗火」，由粗聲粗氣變了鐵漢柔情，更指他們對老人家、孕婦、小朋友特別好，「見你拎住一袋二袋都會搬張櫈仔畀你放嘢」。
男網民：見到麻甩佬就唔係呢個玩法
有網民更指試過身上沒有現金，「收銀姨姨就問D伙記身上有無Cash，叫我過數畀佢哋就得，真係好好」。不過有網民指澳牛哥哥「大細超」，對女生特別好，指「你試吓一個麻甩佬一袋二袋拎嘢入去坐，睇吓會唔會畀位你放嘢」、「嚟緊開返關多返遊客，大家又準備受死，好好享受暴風雨嘅前夕」。
