港女用餐後現金不足找數 欲離開撳錢被要求留下手機或同行小朋友：有無搞錯？
事源有名女食客近日在Facebook群組「香港茶餐廳及美食關注組」發文引起相當大的迴響，以「勁受氣，被店員出言侮辱恐嚇」為題受到關注。事源她指與小朋友在上環一間餐廳用膳，埋單是發現沒有足夠現金找數，八達通亦無足夠餘額，打算用電子支付，惟餐廳「無得畀手機支付，連信用卡都唔得。門口收銀嗰度明明有部機貼住可以Apple Pay同埋Samsung Pay，去到收銀姐姐又話貼住唔代表用到！」她續指，店方隨即要求她放下手機再去「撳錢」，但由於自己要用手機才可「撳機」所以拒絕。然而店員再叫她留下同行小朋友在餐廳等候，她即指：「有無搞錯？小朋友得幾歲，擺低？」
店員質疑食霸皇餐 港女：你點解要跟蹤我
事主又指，當時小朋友表示要去洗手間所以向店方提出半小時內回來找數協議，指「你哋有CCTV嘛，如果我半小時內未返，你哋就報警啦」，然後帶著小朋友離開餐廳並去附近百貨公司洗手間。豈料事主發現有一名餐廳男店員一直尾隨她們，指「佢一見我哋就勁大聲大叫，話『小姐，你撳機先好唔好啊？你去乜Ｘ嘢永安 ，食霸王餐唔俾錢？』」。而當她們走到港鐵站一個出口的升降機時，該名男店員更阻擋升降機門關上，於是只好通知港鐵職員協助，而男店員亦致電餐廳。
女事主表示，隨後有一名態度非常好的餐廳店長前來道歉，更帶備「散銀」找續，事主指「我一直態度都好好，只係唔同意要擺低小朋友，其實如果你哋要搵人同我一齊去撳機，當時係可以講聲，並唔係我行出門口之後搵人跟蹤」。事主又斥男店員在街上突然「大嗌大叫」嚇到小朋友，聲稱不會再光顧該餐廳。
店方：係佢一直帶店員遊花園
Hoy電視節目《一線搜查》就此向餐廳查詢，得到負責人回應，指當時事主稱去撳機，在場店員為免她帶著兩位小朋友「走嚟去去」怕麻煩，因而提議讓小朋友在店內等待，惟被事主拒絕，並向店員表示：「我一個鐘後返嚟畀錢」，說罷便離開了餐廳。負責人澄清當時店員有向事主表示與她同行去撳錢，惟事主卻一直帶店員「遊花園」。至於事主投於店員以粗口辱罵，負責人則指該店員平日相當少發言，不相信同事會用粗口傷人。
負責人反駁：完全無講過放低身份證，亦無貼出電子支付告示
對於事主表示店舖不接受她放下身份證，負責人連番否認：「無！佢完全無！無呢回事！如果佢真係有擺低身份證，去隔離撳錢，需要幾多時間？咁你擺低，就算返嚟拎返都好快。」負責人亦提到，店鋪只接受現金或八達通付款，並沒有貼出接受其他電子支付的告示。
網民：留低嘢係好正常囉！
事主鬧得火熱，網民亦毫不留力地狠批事主，指「餐廳保障自己有咩錯，無錢係要留低嘢做擔保㗎啦」，更指事主蠻不講理，稱「自己無錯永遠係人地錯」、「現金又無，八達通又話無錢，銀行卡又無，走數3寶都齊點信你」、「公道D講，十個有九個都會覺得係想借尿遁走數」、「你要去廁所，去完就撳錢啦，好似要避開人咁，怪得邊個？」。當有人指「唔放得低電話，咪放低身份證，點解唔得？」，事主則表示餐廳拒絕，「佢哋話唔會收人哋身份證呢啲咁私隱嘅嘢。」
