極簡推介 ｜ 日本恐怖漫畫大師 伊藤潤二 13大恐怖經典

01 ｜美女定怪物？「富江」系列

所有男人見到富江都會愛上佢， 為咗佢殺人放火都肯，仲個個都會愛佢愛到要殺死佢，跟住再自殺。但無論點殺佢都會重生，核突在佢係會喺個傷口度由個頭開始生番出嚟，或者係生啲 畸形怪物樣出嚟。分咗屍就仲大鑊！分幾多件就生番幾多件出嚟，無窮無盡。而不同嘅富江又會誘惑男人去殺死其他嘅自己。

正常樣嗰陣係靚女，但一影相就變咗咁。

或者咁。

02 ｜ 可怕小孩－「雙一」系列

一個個口成日含住啲釘嘅小學生，話係因為自己缺乏鐵質，成日陰陰濕濕嚇人，釘稻草人嚟詛咒人，做埋好多令人不寒而慄嘅嘢，但次次都自食其果。有次就因為咁被佢表姐打咗一巴，而啲釘就插晒出去塊面度。

雙一最鍾意釘稻草人詛咒人。

有次佢整咗個同老師一模一樣嘅公仔，之後個公仔取代咗真正嘅老師。

03 ｜ 奇怪審美觀？可怕的「時裝模特兒」

長相恐怖，有一大棚尖牙，身形仲高大過男人嘅女人，完全唔知點解會做到模特兒。

題外話，最後模特兒居然離奇地同雙一結咗婚，可謂最恐怖嘅組合。

04 ｜ 經典系列－「漩渦」

由一個小鎮開始蔓延開去，務求令到所有嘢都變晒漩渦，包你睇到暈陀陀！

最後連人都變成漩渦狀，或直接變咗做蝸牛，被其他人追住嚟食。

05 ｜ 比大白鯊還可怕的「魚」

感染咗病毒嘅魚就會發出腐臭，仲會好似怪物咁生啲蜘蛛腳出嚟，爬晒上岸。

連鯊魚都上岸食人，勁過「大白鯊」！

人感染咗病毒後，都會腐臭同生蜘蛛腳，極其嘔心。

06 ｜ 吊死人的「人頭氣球」

有一日天空突然出現同每一個真人一樣樣嘅氣球，個氣球誓要吊死同自己一樣樣嘅人，搞到啲人要匿埋晒喺屋企。點都係死路一條，一係餓死，一係出去被佢吊死。

唔好以為射穿個氣球就冇事，射穿咗，真人都會同個氣球一樣漏氣而死。

07 ｜ 有生命的「稻草人」

村入面興起將案山子（即係稻草人）插喺墳墓邊，咁佢就會慢慢生啲頭髮同眼耳口鼻出嚟，似十足十死者個樣。

最恐怖係佢哋會有表情，仲會報仇添！

08 ｜ 至死不渝的愛

鎮入面嘅學生好流行喺十字路口玩愛情占卜，只要喺濃霧嘅日子向第一個遇見嘅人問卜，就可以知道吉凶。相傳有個「十字路口美少年」，每次佢都會講啲唔好嘅預言，向佢問卜嘅人都會割頸噴血自殺而死……

喺十字路口自殺嘅鬼魂會繼續留喺原地搵人問卜。

遇見十字路口美少年嘅人都會著咗魔咁聽晒佢講。

所有女人都會愛上十字路口美少年，仲會為咗佢而自殺，簡直係男版富江。

09 ｜ 呻吟的排水管

有個發出惡臭嘅肥仔滑井鍾意咗一個有潔癖嘅同學令奈，但被令奈拒絕咗。有日令奈屋企嘅排水管塞咗，仲聞到間屋瀰漫住一股熟悉嘅臭味……

令奈個妹話滑井匿喺排水管度偷睇佢，令奈梗係唔信，仲塞阿妹隻手入去排水管入面，結果連阿妹都被佢扯埋入去。

10 ｜好哥哥為妹妺製作的「溶解教室」

高中轉校嘅夕馬同小學生細妹千澄相依為命，千澄講嘢惡毒，仲成日企喺路口發狂咁追住其他人，話要食人哋嘅腦漿，夕馬就經常幫阿妹土下座咁周圍向人道歉。

原來夕馬召喚咗惡魔，佢同人道歉得愈勁，惡魔就會溶解人嘅腦漿，而阿妹就可以大飽口福。

11 ｜ 好奇殺死貓－「鬼巷」

男主角石田搬咗入一間民宿度住，佢成日瞓到半夜就聽到隔籬條巷好嘈，但條巷係兩邊都封死晒嘅無人巷，咁究竟點解會咁呢？於是男主角游繩爬咗落去條巷，並發現咗驚人嘅秘密。

兇手小忍喺條巷度睇住啲人形慢慢浮出嚟，真係好恐怖。

12 ｜ 眼看手勿動－「墓碑鎮」

呢個鎮入面嘅人死咗係唔可以掂嘅，佢哋會慢慢喺原地化做墓碑。如果被人掂咗，咁屍體就會發出惡臭，仲會變怪物咁嘅樣，成唔到佛，而掂屍體嘅人亦會遭受同一命運。一對由外地嚟探朋友嘅兄妹喺不知情下撞死咗朋友個妹，仲移動咗佢……

怪物嘅樣真係好嘔心。

13 ｜ 你嚇人人嚇你－「逃兵之家」

昭和二戰時代，逃兵古川匿咗喺一家四兄妹嘅屋企度，但之後因為佢，間接令到大家姐喺空襲時死咗，為咗報復，就算戰爭已經結束咗8年，成家人都呃佢話仲打緊仗，又嚇佢有憲兵要嚟捉佢，煙花大會就話係美軍空襲，點知……

古川一早已經畏罪自殺死咗。

最後古川喺度偷聽個側臉，真係令人好難忘。

同場加映：貓日記

如果唔太好恐怖漫畫，但又心思思想睇的話，極力推薦作者嘅貓（奴）日記！搞笑得嚟啲畫又有啲恐怖，係一本輕鬆入門作品。

佢話隻貓係要嚟詛咒佢屋企，睇佢背部有個骷髏頭就知。

嗯，不愧為伊藤潤二。

下一頁：伊藤潤二 | 香港展預想篇

延伸閱讀：

又要驚又要睇！ | 伊藤潤二 6 大作品回顧