1.搭巴士遲到一兩次後，老闆會迫你搭地鐵
住新界出市區做嘢車程遠，時間長已經係老生常談，有幾慘都唔需要再多講。不過最慘係住新界唯一可以保證預計到時間嘅交通工具只得地鐵（一般情況下），當你搭巴士遲到一兩次之後，老細就會同你講：「搭地鐵啊嘛！」呢個時候新界人內心已經崩潰，但臉上依然掛住港島區式SALES笑容。
內心在咒罵「鬼唔知你啊媽係女人，我巴士平又平過地鐵，如果無塞車或交通意外時間又差唔多，仲要有位坐！我真係搵唔到任何一個要搭地鐵嘅理由。」
張口在說著「我會試下㗎啦。」
如是者，新界嘅朋友遷就咗佢老細。
2.同事聚餐地點，距離自己的家愈來愈遠
當你因為遲到被訓斥一番之後，返埋位坐低做嘢果陣，你隔離位個Yuki就明知故明咁問:「遲到啊？」
「喺啊，住得遠巴士一塞車就咁！」
「乜啊，住得近先易遲啊，成日覺得好快好快之後就出事！」
嗯，非洲啲人無嘢食都無你豐衣足食咁慘，食得多會撐爆個肚，內臟器官受損而死。
「咁今日HAPPY FRIDAY一唔一齊成班同事食餐飯啊！」
「好啊，去邊啊？」
呢句說話喺已經做好覺悟嘅新界人先至講得出口，如果當年湯告魯斯套Mission: Impossible嚟香港拍，題材一定係住天水圍嘅你，點約同事收工之後去屯門或者元朗食飯！唔洗問都知班同事一定會因為太遠而拒絕，而呢個星期五嘅晚餐，你只會離你屋企愈來愈遠。
如是者，新界嘅朋友遷就咗佢同事！
3.親戚飲茶要齊人，住新界必定是遷就的一方
同同事食完飯返到屋企嘅你已經疲憊不堪，老媽子遞上熱湯語重心長咁叫你聽日星期六早啲起身，你擘大個口得個窿咁問：「點解？」原來本身約左聽日嚟飲茶嘅親戚有人因為太遠唔方便，所以放飛機，老媽子於是好偉大咁提出咁不如我地過去，齊人啲熱鬧啲。
諗諗下呢班住港島區嘅親戚已經幾年冇嚟，由幾時開始住新界嘅人一定係遷就嘅一方，我真係看唔透。
如是者，住新界嘅一家人又遷就咗佢親戚！
所以如果你身邊有呢啲新界朋友，要好好珍惜同設身處地，得閒就返佢地一次半次！當你同新界朋友食完晚飯，飲完酒，已經沖好涼準備瞓覺果陣，唔好唔記得果位朋友，依然係天邊嘅一方截緊泥鯭的返屋企。
原文刊於：《經濟一週》
