自私家長為睇戲深夜獨留3歲小童戲院門口 街坊鬧爆：個腦有問題！
二人世界對於有小朋友的家長而言並非易事，而屯門近日就發生一宗港產父母拍拖被鬧爆事件。事源有街坊深夜11點時分途經商場戲院門口，發現一男童獨自坐在地下非常可憐，於是上前了解問保安發生何事，保安即時指「佢啊爸啊媽扔低佢自己兩個走咗去睇戲」。街坊聽罷即時大怒，並懷疑疏忽照顧而報警處理。
事件在「屯門友」專頁瘋傳，眾網民齊齊鬧爆自私家長，指「心痛小朋友，如果出左事，後悔太遲」、「其實可以帶埋入戲院，報警等不知所謂嘅父母受教訓」、「真係想像晤到平日係點對小朋友既照顧」、「咁細個小朋友喺門口，呢對父母個腦必定有問題」、「咁細個人仔，你宜家就培養佢做街童」、「簡直唔係人」。
網民擔心小孩回家後的安危
更有網民直斥該對父母看似非首次掉低小朋友而自己玩樂，痛罵現今「好多人唔識做父母」，指「而家呢個年代好多都係生1-2個，咩唔係應該會好好地照顧咩，好多人想生都無得生 ，太過份！呢對父母一定經常性咁掉底個小朋友，完全為咗自己快樂而令到小朋友痛苦，真係好嬲同心痛」。有網民更擔心小朋友回家後的下場，「真係想像晤到平日係點對小朋友既照顧」、「啊爸啊媽咁都做得出，想像唔到佢哋覺得小朋友帶咗咁多麻煩畀佢哋，返屋企會點對佢」。
事件真相揭開 保安員「彈出又彈入」
就在網民鬧爆之際，專頁再度出Post指「希望只係誤會啦，真係嚇親大家」。原來警方接報到場調查期間向保安查詢，得知男童父親如廁後已返回將其接走，事件不涉刑事成分，把案件列作雜項處理。所以事實真相是男童父母當時並非睇戲，而是去洗手間，更有網民留言只屬數分鐘的事，大家都「炒晒車」。
網民爭辯：獨留小童就係唔啱！
其後網民再指保安這次「隨口噏害到人」，指往往都有多事的人未弄清事件前後真相便影相公審，「連親自問小朋友咩事都無問過，結果誤會咗仲以訛傳訛，有無同人道歉，你知唔知累到人」。不過亦有網民指，即使非看戲，深夜11時也不應獨留小朋友在街上，「男童同父親同性別，點解唔可以帶埋去洗手間，唔係咁都覺得無錯掛？」
