港女到尖沙咀打邊爐 火山麻辣湯底突爆炸
日前一名女網民於Facebook群組「香港邊爐關注組」發文，分享她於尖沙咀打邊爐的恐怖經歷。事緣她於前日（12月4日）中午到位於尖沙咀的「黑樺牛」品嚐餐廳主打、每日限量供應的火鍋「台灣麻辣火山鍋」。 台灣麻辣火山鍋是以和牛片圍著鍋中間以冬瓜製作的「火山口」，在上菜時職員會先將湯底倒入鍋旁，酒精則倒入「火山口」，並點燃酒精加熱，形成奪目的視覺效果。
當日事主用餐時職員上菜後亦照樣地將酒精加入火山口並點燃，而她也明確表示自己並無將任何食物及水加入並攪拌湯底。但就在火鍋加熱約10分鐘之後，湯底竟然在她面前爆炸，麻辣湯底直衝上天花板，她亦被衝上天花板的麻辣油由頭淋到落腳，她嚇到奮力向走廊逃離並大叫「個鍋爆炸呀！」
由事主上傳到群組的影片可見，事發現場一片混亂，火鍋上方的天花板被麻辣湯底沾污，食桌、坐椅及事主放在櫈上的Dior手袋亦被爆炸出來的湯底濺到。事主身上可以明顯見到臉上、衣服及波鞋都有麻辣湯底的痕跡。而事主身旁亦有男性友人亦有致電他人：
都要報定案先，因為我哋啲袋嗰啲都需要賠償……員工佢無話到點，佢淨係話會聯絡經理，但係經理唔覆佢，所以我哋點都會報一報案先嘅。
事主眼睛面部遭濺現刺痛感 店員威脅報警就唔賠錢
事主續指，由於她的眼睛及面部被火山漿（麻辣湯底）洗禮，眼睛及面部皆開始出現刺痛感，左眼視力亦有點朦糊。店長向她解釋由開店起從未試過有同樣情況，同時亦拍下如此的「世界奇觀」後致電經理。但在她仍在恐慌之中時，店長指經理表示會賠償清潔費；不過如果選擇報警，此餐仍需收費。最終事主為了保障自己，她亦選擇報警處理及入院觀察，而醫生診斷她為面部燙傷。
最後她亦在帖文上寫上「賠償並不重要，但受傷如果係小朋友，老人家，後果不堪設想。真的憤怒了！」更形容這餐飯為「淋浴麻辣火山鍋」，並用hashtag諷刺到「#感謝你熱情款待」。
現場影片
大批網民譁然：仲夠膽兇人唔好報警？
事件爆出後，引發大批網民譁然，網民紛紛慰問事主外，更大力批評餐廳在事件發生後沒有道歉之餘，竟然仍想向受傷的事主收費，「炸到人一身係，佢又好意思收錢」，處理手法極有問題！網民皆憤慨地炮轟到：
【極度疏忽＋處理手法離譜】「餐廳極度疏忽，完全漠視當中危險性。事後處理手法亦好離譜，更加令人難以接受。正常人整到塊面，或者其他地方，都影響一生。何況係一個女仔。」
【唔打算負責任？】「個店長同個隱藏經理啲態度咁差，整傷人都想唔負責任，最基本既食客安全都唔理，沒有資格開餐廳！」
【爆炸仲想人唔出聲？】「嚟食嘢就梗係預咗俾錢㗎啦，但依家係你個嘢爆炸，仲想人唔出聲，過後反口唔賠點啊，依家全香港都知你地啲火鍋咁危險！」
【公司形象食客安全】「即時道歉慰問係基本啦，個經理仲L onX，顧住公司形象仲大過個客人？第一日做飲食業？未L做過服務性行業？你 貴公司要調查點解會爆炸你哋自己嘅事，但點樣去處理突發事情都唔L識！」
【真係祝你生意興隆！】「其實你哋個鍋會爆炸，個客無嚴重受傷你哋已經偷笑啦！如果佢咁啱個頭傾前，爆到應一應，到時你哋周身蟻…道歉都無句，仲夠膽兇人唔好報警，否則收返餐飯錢…你個餐咁巴閉？十萬九千七呀？？離譜到咁，真係祝你生意興隆喇..」
另外，因為餐廳在Facebook帖文介紹涉事的「台灣麻辣火山鍋」時，內容寫到「經歷完火焰嘅洗禮🔥，麻辣湯到達一定嘅溫度會從火山口流出猶如火山爆發一樣🌋🌋」不少網民亦在該帖文下方留言處諷刺到「同你標題果然一樣，達到一定嘅溫度會從火山口流出猶如火山爆發一樣」、「個客真俾你火焰洗禮，爆到面同身都燙傷」。
及後事主亦更新帖文，指出在出post後餐廳已主動聯絡她作賠償事宜：
多謝大家關心，我無事。餐飯警察嚟到就話唔使我俾。
而頭先餐廳都終於打嚟道歉，但出哂post先打有咩意義。最神奇係佢話約咗我星期三和解，但我完全唔知。
黑樺牛2日後致歉：現時已積極與事主溝通
而事發2日後，黑樺牛終在Facebook專頁張貼道歉啟示，表示事發當日已立即停售該產品以確保客人安全及了解事件。但前線同事當時未能及時為事主妥善處理的確為公司的責任，承諾會加強用餐安全及員工的內部培訓，以加強同事處理突發事件能力及確保同類型事件不會再次發生。現時已積極及誠懇地與事主溝通，確保事主得到合適的醫療支援及財物損失上的補償。
