秋風起 ! 食盡本地 3 間 大閘蟹放題

Text : Ruby    Photo: Wing ,Woody

01 | 頭30位 $98任食！大閘蟹加花膠蟹鍋～

今年率先加入的生力軍，是九龍灣啟業邨的冬菇亭！大閘蟹來自Kelly江蘇朋友的蟹場，每日到貨，每隻約3-4両，蟹乸較細，約2.5-3両，蟹體型雖小，但膏量適中，放題一晚可消耗千多隻！除了清蒸大閘蟹任食，一個價錢還包打邊爐，火鍋料都是任點任食。有紀錄以來，有人最多可一次過食30隻。

價錢：每晚頭30位 $98可食75分鐘，額滿後每位$238，可食1.5小時，

食過大閘蟹，就來打邊爐。雖說是放題，但兩款湯底湯底絕不馬虎。胡椒豬肚蟹湯，用上十幾斤重豬骨熬製至少三至四個鐘，湯色呈白，加上大量原粒胡椒，香辣惹味，煲住食真是暖粒粒。點睛處在上桌時，放入兩隻大閘蟹，蟹黃流入奶白湯底，泛起黃油更甘香。

至於任點任食的火鍋料，選擇不算多，但用料講究，特別是肉類，有美國安格斯牛肉、鹿兒島黑豚肉和紐西蘭羊肉片，肉味濃，脂肪和肉比例適中。其他還有芝士丸、蟹子丸、出前一丁、六款菇菌蔬菜等選擇。

記者點評

優點：
1.75分鐘打埋邊爐有點急，好在蟹上得快，密密食，一般可食到6-7隻，回到本。
2.蟹雖細隻，但蟹膏算多，味道甘香。
3.火鍋用料靚，有安格斯牛、鹿兒島黑豬等。
4.邊爐蟹煲湯底顏色奶白，口感厚滑，足料。
缺點：
1.天氣還未涼透，坐戶外感到相當熱。
2.飲品自費(幸好不貴，汽水啤酒$5)，蟹醋需每位另加$10。
蘇記大閘蟹
地址:荃灣二陂坊13號舖
          九龍灣啟業邨啟業街2號熟食亭
電話:5118 0644 / 5282 0029
營業時間:5:30pm-2am
收 費 : 3-4両大閘蟹任食成人$238、 小童$128(10時前入座)成人$198、小童$118(10時後入座)

4-5両大閘蟹任食 成人$328、小童$288(10時前入座) 成人$298、小童$258(10時後入座)
備註:不設加一,每日5點派籌,頭30位顧客可享 $98優惠

02 | $369 酒店buffet蟹世界！有齊大閘蟹麵包蟹同膏蟹！

冬菇亭過後，任食的還有酒店。這個以「蟹」為主題的自助晚餐。一次過可吃盡四、五款蟹。先說大閘蟹，全部都是四両重太湖大蟹公，隻隻紅潤光澤，每次蒸出三、四十隻，不消幾分鐘就被人掃光。記者一試，蟹夠熱，雖然膏量不算多，但夠厚滑，排幾次隊都值得。

1. 鱈場蟹柚子沙律 蟹腳拆肉，拌沙律菜、柚子肉，再加入酸香青檸汁，作開胃前菜最佳。
2. 阿拉斯加蟹肉果凍 青瓜汁作果凍，內裡有蟹肉、甘筍絲、蟹仔造型青瓜片，口感爽彈。
3. 意式香草鮮茄蓉地中海布朗蟹 以鮮茄、水欖作醬汁，酸甜微甘，配鹹鮮麵包蟹，蟹肉味道更突出。
4. 九層塔咖喱香辣肉蟹 肉蟹斬件走油，再加入九層塔、辣膏炒香，香辣惹味。
5. 百花炸蟹鉗 用蟹造型麵包盛載，蟹鉗以墨魚膠加蝦膠打成，再炸至金黃，外皮香脆，內裡彈牙。

凍海鮮有阿拉斯加長腳蟹，另外以雪場蟹、肉蟹和麵包蟹做的菜式，起碼有7款以上。最富創意的阿拉斯加長腳蟹果凍，用青瓜汁加魚膠片做成，配上條條蟹肉、蟹子和青瓜絲，爽滑清新；重口味的可選香辣惹味的咖喱肉蟹。蟹粥特別推介，粥綿入味，有膏蟹件食；百花釀蟹箝，以一個頭咁大的蟹型麵包盛載，立即吸睛。飯後甜品吃件蟹仔酥餅點綴的果撻和泡芙，好一個蟹蟹蟹世界。Btw酒店位於黃竹坑，可以玩完哈囉喂去歎！

記者點評

優點：
1.可以一次過食到五、六款蟹種，$400有找，蟹痴必Like。
2.蟹菜式多樣，Refill得快。

缺點：
1.除了蟹，場內有燒烤、凍海鮮等，但沒生蠔，選擇一般。

如心南灣海景酒店 LIS café
地址:香港香港仔黃竹坑道55號
電話:3968 8833
供應時段:即日起至11月9日
收費:星期一至五 成人 $369/ 位,小童 $218/ 位
星期六至日及公眾假期成人 $389/ 位,小童 $238/ 位 備註:以上價錢已包加一,收信用卡

04 | 頭20位激抵價$68入場！放題先軀大閘蟹

在國內經營十多年大閘蟹生意的上海新大眾，早幾年登陸香港，去年首辦放題反應極好，主角大閘蟹，有大細選擇，最平的有三両半重，每位 $268，隻隻爆膏，肉質新鮮得一梳梳，味道鮮。掂！平時3両半公蟹約$50/隻，食五隻已經回本，不過任食的蟹粉小食，如蟹粉水餃、生炒蟹膏臘味糯米飯、蟹粉扒時蔬，質素就一般，最食得過就是大閘蟹粥，粥底香綿，但蟹味欠奉，任食時間只得75分鐘，都是食蟹最穩陣。

放題6pm開始，如夠早來排隊，每店頭20位客人，可以激抵價$68入場搏殺。大閘蟹放題只做到12月中，各位睇準時機衝喇！

茶記格局，座位寬敞舒適，感覺乾淨。臘味糯米飯加入蟹粉落鑊炒，食落煙韌，但味道略淡。水餃自家包製，皮夠薄，餡料亦有小量蟹粉，但食落韭菜味搶薑。

蟹粥以珍珠米加薑熬,再放入大閘蟹。蟹膏 流入粥底,色澤金黃,鮮味欠突出。時蔬面 鋪滿蟹粉,食落鹹香。

記者點評
優點：
1.大閘蟹膏量和肉量多，蟹乸爆膏，實淨甘香；蟹公有白膏，鹹香軟滑。
2.設專用蟹櫃，蟹很新鮮。
3.環境舒適闊落。

缺點：
1.蟹粉菜式質素一般，可集中精力食蟹。

上海新大眾大閘蟹專門店
地址:觀塘敬業街69-71號利華科技中心地舖
電話:3954 5190
營業時間:6pm-2am
收費:3両半-4両大閘蟹公及3両蟹乸 成人$268、小童$128(10時前入座)
成人$248、小童$108(10時後入座)
4両半-5両大閘蟹公及3両半蟹乸 成人$348、小童$248(10時前入座)

成人$318、小童$228(10時後入座)
5両半-6両大閘蟹公及4両蟹乸 成人$528、小童$388(10時前入座)
成人$488、小童$338(10時後入座)

備註:設加一，只收現金。
$68優惠只限每分店頭20位顧客。
星期五、六、 日及公眾假期前夕須另加 $10。
土瓜灣、黃大仙、石硤尾、 元朗另設分店
詳情瀏覽 www.suntaichung.com