南生圍改建outlet ？！大家對南生圍嘅印象離唔開野餐、放風箏，而南生圍最著名嘅橫水渡更加係文青影相打卡位。但自從地產商喺上年入紙申請改建 南生圍 ，呢塊「樂土」將會被改建成12棟outlet商場及商業魚塘，發展成商業用途後，幾乎唔會再有公眾休憩用地。消息傳出後，網民立即指「南生圍告急」，同時發起「一人一相撐南生圍」活動！
圖：盡在元朗、萬人聯署‧決不讓南生圍淪陷、網上圖片
發展以商業為主，偏離規劃意向
目前城規會將部分嘅南生圍發展計劃書上載到官方網站，土地將會被改建成outlet城，建築物有12棟咁多，面積更加接近10個香港大球場咁大嘅草地。
除咗購物商場之外，商業魚塘亦被指概念同魚塘保育係兩回事，甚至影響生態同雀鳥嘅生命周期。
睇嚟發展計劃唔單止達唔到保育效果，更加會對南生圍濕地造成永久嘅破壞！
反對改建！10月21日前向城規會發表意見
如果覺得南生圍消失好可惜，大家記住喺10月21日之前向城規會表達意見，分別可以透過網上或書信提交。
表達意見傳送門：城規會網頁
網民發起「一人一相撐南生圍」及「萬人聯署‧決不讓南生圍淪陷！」
隨住發展 南生圍 項目迫近，網民呼籲大家除咗向城規會發表意見之外，亦可以喺facebook專頁「盡在元朗」上留下屬於自己嘅南生圍照片，實行一人一相撐南生圍。
亦有網民列出反對發展南生圍嘅理由，歡迎其他人借用向城規會表達。
1）非必須之發展而且破壞生態，是不值得之犧牲。
2）元朗區已夠擠迫，交通配套根本不能負擔。
而另一個facebook專頁「萬人聯署‧決不讓南生圍淪陷！」亦發起聯署行動，反對發展商喺濕地上建豪宅。
facebook專頁發文，呼籲網民複製範本信件，然後登入城規會網頁提交意見，信件的重點大約如下：
南生圍是屬於每一位香港人，而非發展商私人的後花園。
讓我們和下一代，能夠繼續接觸大自然；讓我們的香港，能夠繼續落實保育的可持續發展。
留言中見到唔少網民都響應行動，捍衛南生圍，反對喺呢片土地上進行任何發展項目。
