延伸閱讀：【藍月亮】香港出現罕見「藍月亮」！即睇最佳觀賞日期時間
中秋節好去處2020｜ 6大中秋賞月秘境推介 賞月打卡睇靚景！
撰文：GOtrip編輯部｜編輯：CY｜圖片來源：GOtrip編輯部
1. 魔鬼山礦場採月
拉大隊去荒廢礦場，追月加埋探險就夠晒驚喜！鯉魚門三家村一向畀人印象係龍友天堂或者食海鮮勝地，但一到大時大節，呢度就變咗一個自成一國嘅遊樂場，村民同遊人都聚集村子盡頭嘅舊礦場上玩燈籠同BBQ，仲要係自己執石頭就地透爐嗰種（但唔建議讀者跟住做，因為犯法的），raw 得嚟風味十足！
背山面海有個大草地，簡直係天賜的賞月好地方！不過礦場長年冇人打理，沙石挺多，千萬別著拖鞋，免得腳趾受罪！
礦場上有不少前人留下來的石屋，夜晚闖入去一定更加有探險feel，但記住要帶電筒！
礦場臨海一端可以遙望將軍澳，景觀開揚，日間是釣友的集中地。
三家村其實由幾條村組成，包括嶺南新村同馬環村等，乃到礦場探秘必經之路，不妨早些到來，欣賞沿路好風光。
一於去漁村氣氛傳統又夠人情味的鯉魚門三家村啦！呢度景點獨特兼具歷史，節日嚟玩仲可以有故事聽！
鯉魚門三家村礦場
附近飲食：鯉魚門海鮮酒家眾多，平均消費$300-500/位。
港鐵油塘站旁的鯉魚門廣場有食肆，也有售燒烤食品，村內士多則只售燒烤叉及炭。
交通：
1. 觀塘政府合署乘紅van往鯉魚門市政大廈 （$4），再行25分鐘
2. 西灣河鯉景灣往三家村渡輪碼頭 （$5.5），再行25分鐘
3. 港鐵油塘站向鯉魚門方向步行40分鐘
泊車：鯉魚門市政大廈一帶設有多個停車場
2. 山頂奔月野餐
以為山頂只有凌霄閣同山頂廣場的你們就錯了！真正的太平山山頂不在纜車站，而在更高的位置，那裡有個秘密花園，可以同月亮先生face to face！山頂公園原址為香港總督別墅，有一大片青草配搭歐陸式建築，24小時開放，絕對係野餐兼賞月追月的好地方！
四方同拱圓等4種不同的涼亭坐落草地，部分附有射燈，夜晚去特別浪漫。
其庭園都好英式，園內草地接草地，狗仔與人都行得好舒服。
另外一個發現就係登山頂公園必經柯士甸山道（太平山餐廳旁的上斜車路），約行10分鐘會到另一個草地公園－柯士甸山遊樂場，面積雖然較山頂公園細，但唔夠腳力登頂，可以選擇索性在此賞月！
山頂公園冇交通工具可以直接到達，可以享受到一個寧靜的夜晚，賞月之餘，可以一併睇山下夜景！
山頂公園
附近飲食：山頂廣場的食店營業至11:00pm，便利店則營業至12:00mn
交通: 1. 中環瑪頭乘15號新巴往山頂廣場，再上行30分鐘便到山頂公園
2. 金鐘乘的士直達山頂公園，約$60
泊車：山頂公園設公眾停車場，約20個車位
3. 觀塘海濱砌積木
提到觀塘海濱，相信大家都會諗起長廊上有個10米高的積木藝術裝置，每隔30分鐘會進行水霧音樂噴泉表演（6:00pm-10:00pm），幾有feel！近年不少人都喜歡到觀塘海濱賞月打卡。
有燈飾表演睇之餘，又係一個影相位置，仲有好多賞月靚位！
觀塘海濱長廊
地址：觀塘公眾碼頭旁（基業街底勵業街入）
附近飲食：最近的食肆集中在港鐵觀塘站一帶
交通：港鐵觀塘站步行約10分鐘
泊車：觀塘碼頭廣場
4. 大橋秘灘月映紅
大時大節有邊個海灘唔多人？相信麗都灣是可取之選。麗都灣坐擁青馬大橋同汀九橋，入黑後，燈飾亮起靚到暈，拍拖帶女朋友嚟最有情調！
雖然麗都灣設施不多，但勝在浪漫搭夠，加上環境舒適，不失為賞月好選擇。
荃灣麗都灣
地址：青山公路11咪半
附近飲食：帝景酒店及深井一帶食肆
交通：1. 荃灣西鐵站或富華街乘234 B（$4.6），麗都灣站下車
2. 西樓角路小巴總站乘專線小巴96 C（$5），麗都灣站下車
泊車：汀九橋底公眾停車場，車位約25個
5. 單車遊＋瞓草地
如果你唔介意行多兩步，一於入東涌！東涌有兩塊草皮曬月光，首先有古窯公園及機場緩跑徑，唔單止鄰接海邊，風光明媚又有文物睇！而南環路仲可以觀賞飛機升降！無論你想喺草地hea、散步或者踩單車都非常適合！
南環路係廣告與MV熱門拍攝場地，至跑道盡頭觀賞飛機隆隆在頭頂飛過，好正！
東涌大草地
地址：赤鱲角過路灣路&南環路
附近飲食：東薈城、富東邨商場
交通：機場緩跑徑－東涌巴士總站乘九巴S1（$3.5），東輝路下車，沿過路灣路走回海邊
南環路－東涌巴士總站乘城巴S52（$2），南灣路下車，再向機場跑道盡頭行15分鐘
泊車：東薈城、富東邨停車場
6. 移動城堡觀星
森林入面有座巨石塔，滿布藤蔓，到底我去咗天空之城，定係哈爾移動城堡？錯喇！雖然似足日本動漫場景，但西貢水浪窩的觀星台原來係國貨，觀星賞月同樣一流。
水浪窩燒烤地點設有二十個爐位，另有洗手間及樹木研習徑。節日可以喺度親近大自然，順便BBQ！
水浪窩觀星台
地址：西貢水浪窩
附近飲食：水浪窩有士多，但中秋日營業時間不固定
交通：西貢市中心乘巴士99號或299號於水浪窩站下車，車程約15分鐘
泊車：冇
