photo：Him
去日本旅行，當然唔會錯過食 Omakase 。雖然日圓仲未過7算，但都唔係話飛就飛到。中環一間隱世 Omakase 秘店，就可以食到由師傅嚴選嘅時令海產同食材，同埋由佢發辦嘅精緻料理藝術。呢間店已經連續4年攞到 米芝蓮 推介壽司店，水準有星級保證，隨時想食 Omakase 最鮮味嘅心思料理唔使飛日本喇！
每日空運直送日本靚食材
位處中環雲咸街樓上店嘅玄鮨，由曾於著名壽司店任職大廚嘅總廚鄭師傅坐鎮，食店以供應刺身、壽司為主。玄鮨每日都有新鮮魚類、海產等食材，由北海道、九州、東京等地直送，每件刺身、壽司都好新鮮，一放入口食到嘅係鮮甜嘅肉質同油脂，完全呃不到人。
配搭罕有食材
玄鮨除咗會供應香港人最鍾意嘅魚類刺身同貝殼類之外，亦會提供特別嘅食材，例如海鰻魚苗、鱈魚白子。海鰻魚苗味道較淡，質感爽滑，簡單配薑蓉、蔥花，就食到佢嘅鮮味。而鱈魚白子，即係鱈魚嘅精巢，好補身㗎，日本人都幾鍾意食，香港嘅日本料理店就比較少見，白子質感柔滑肥美，配Ponzu sauce日本酸汁最夾，既可去腥又能帶出甘鮮味道。製作壽司，好多師傅都用常見嘅左口魚，但玄鮨又會揀鰈魚嚟用，貪佢質感較煙韌彈牙，令客人食落有唔同嘅感覺。
不時不食 抓住冬日尾巴
不時不食、品嘗最鮮，絕對係 Omakase 嘅大原則。依家呢個季節，正值冬天同春天交界，趁日本仲係凍凍哋，鍾意食肥美嘅魚生、貝殼類（蠔、帆立貝）嘅香港人，就要捉住冬天嘅尾巴喇。鄭師傅教路，秋冬至春天（11月至2月）好多魚類都新鮮肥美，因為天氣冷，所以油脂較豐厚，例如大拖羅、大油甘魚、赤目魚等等，油分豐腴甘香，入口即溶，所以呢啲食材喺今期嘅 Omakase 都會常用，秋冬季嘅魚類、海產選擇可以有40至50款咁多！
另外，每年2至3月就以帶子、象拔蚌、北寄貝、海鰻魚苗、熒光魷魚等等，最時令當造，識揀嘅 Omakase 師傅梗係用佢哋入饌。
4屆米芝蓮隱世 Omakase
玄鮨已經連續4年（2014-2017年）入選為「 米芝蓮 指南香港澳門」嘅推介壽司店。而且佢哋採取自由度高嘅 Omakase ，坊間一般會有固定嘅廚師發辦餐牌，但玄鮨就會經常轉款，食客預早訂的話，更可以因應個人喜好而為餐單作微調，甚至要求餐牌冇嘅食材，客人可以食到自己最想食嘅菜式，彈性大。玄鮨剛好坐落喧鬧嘅蘇豪同蘭桂坊之間，環境寧靜雅致，喺呢度歎 Omakase 好舒服。