中大櫻花開咗｜大媽、龍友踩冧校園學生宿友鬧爆外來客

中大近排都真係多災多難，早排先有新聞話大批大媽團竟然組織入人哋校園打卡，最近天氣回暖，中大嘅櫻花早幾日已悄悄開咗，結果便引來蜂擁的外來非學生龍友、妹子同大媽來影相和打卡，學生又群起鬧爆。

撰文：杜遊珍

中大種櫻花多災多難

中大種櫻花，源於十多年前中大日本研究學系獲贈來自日本姊妹大學的櫻花樹苗?，選址種植在新亞書院山頂知行男宿舍門前，諗起其實都幾大反差！最初共種了10棵櫻花，可惜被強風、颱風吹剩7棵健在，但相信中大唔多旺呢幾棵河津櫻，舊年10月因為太熱，忽然提早開櫻花，已被龍友大舉入侵一次；最近2月初櫻又有人在行山打龍討論區報料，話中大櫻花又提早綻開，結果人日都未過，又開始聚集腳架和長炮。

大陸賞櫻團進駐新亞

前主播、中大教授區家麟呢兩日都有報告新亞櫻花開花情況，仲暗串「中大櫻花開，龍友齊齊來。#有一大棵咁多」、「龍友數目已增至一打」。

行山討論區已引起龍友關注

櫻花才剛開，已有人在行山吹水群組放料，引起唔少愛郊遊同打龍嘅人注意，隨時觸發第一波賞花人潮！校園雖然係公眾地方，中大校巴也不能唔准非師生乘搭，但香港人一窩蜂做一件事，就必定有人要犧牲，今次又係中大喇！

學生鬧爆咪踩冧人哋校園

其實阿珍當年聽到中大種櫻花已心知不妙，自從新亞起咗一個「天人合一亭」之後，不時都吸引好多校外人山長水遠上新亞山頂打卡，係，我都覺得水池呢個位係好靚嘅，但其實已今非昔比，山下成個科學園同咩富海灣，早就天地不合，老遠仲有一座觀音像，仲引晒啲大陸大媽團入嚟，雖然未至於9:00am-6:00pm都人頭湧湧，但宿舍就喺隔籬，畀我都會嬲！