東京成田機場 算是數一數二多嘢行多嘢買的機場，大部分熱門嘅貨品，都喺機場可以搵到！輕輕咁幫大家格過下價，價錢比市區買貴少少，不過！佢唔計落你行李重量入面（已經入咗禁區，check-in咗）！仲有空港限定嘅貨品，最啱啲未買夠嘅人！
01 ｜藥妝篇
藥妝貨品算少，只得最基本款的，如果之前因為驚爆喼而冇買，可以喺度買，價錢相差不遠～專櫃貨會多點！要小心管好銀包＞＜！
02 ｜ 電器篇
有點令人意外，電器都幾齊下（相比起藥妝），不過價錢貴過市區啊！以 24K Beauty Bar為例，我喺激安買就約 HK$1,100，呢度折咗都貴幾百！大家有心買記得喺市區買～不過都有啲係差唔多價嘅，大家可以參考下～差唔遠嘅，機場買啦，唔使托嚟托去！
03 ｜手信篇
去旅行，最令人頭痕就係買手信！我自己平時都鍾意入咗禁區先買，貪佢方便，同一個地方可以買齊晒～又唔使辛辛苦苦攞去機場，仲要佔行李空間！Royce、Tokyo Banana、白之戀人，呢啲通通都可以買到！識買一定入閘後買！
