【坂出観光魚市場】無論去日本哪一個地方，魚市場都必定會列入大家的行程之內，為要一嘗最新鮮的日本當地海鮮。東京有築地，大阪有黑門，至於四國，就有一個幾乎是全日本最抵食的坂出観光魚市場，只要100円，成條三文魚都買到。
撰文：Elam｜攝影：Scott
反傳統海鮮拍賣 價低者得
坂出観光魚市場每逢星期六大約10:15am，都會有專為遊客而設的拍賣活動。拍賣當日，新鮮捕獲的瀨戶內海海產，平常拍賣都是價高者得，這裡卻一反傳統，價低者得。
100円買原條三文魚
主持人會取出要拍賣的海鮮，例如原條三文魚、一盆蝦等，海鮮款式和數量隨當日而定。主持人開出拍賣價，例如1,000円，然後開始由現場人士叫價，每口叫價下調100円，直到有人叫到100円，就會賣出，超級划算。
仲有下場：免費任食Maguro中落
拍賣完之後，大約11:00am，魚市場會舉行吞拿魚解體show，即劏新鮮從九州或瀨戶內海域捕獲的原條黑鮪魚，分成不同大小賣，按時價賣。
劏到差不多，到中落（即魚骨）位置時，師傅會將中落位置的魚身全都刮出來，即場讓大家免費試食。中落分量至少裝滿五、六兜，多到現場每人至少吃到五片，甚至最後成兜攞走都冇問題。
其餘會切件包裝好發售，任何部位都有，甚至魚頭都可以買走。
想坐低堂食亦可，1,500円/約HK$107就有齊赤身、中拖羅和大拖羅刺身，每款三片，幾抵食。
海鮮食堂
魚市場內設大大個食堂，專食海鮮，定食、刺身、小食都有，而且價錢划算。陣容鼎盛的天丼，有齊蝦、鰻魚、魷魚、南瓜、茄子、青椒，材料新鮮，都只是賣1,600円/約HK$114。
食堂有150個位，座位之間相當闊落，地面亦乾爽冇水跡，坐得舒服。採自助形式，先到自助付款機買票，再交給職員。另外會擺出一些小食、刺身等，見到心水，可以直接取下來，最後一次過付款。
手信店
食堂旁邊是零售店，賣當地特產和海鮮，食完飯後去逛個圈，順道買手信，夠方便。
海の幸ふれあい市場
地址：四國香川縣坂出市入船町1丁目5番14號
網址：uminosachi-fureai.co.jp/
申請DBS Black Card輕鬆賺里數，享低至1蚊1里，獎賞達80,000里！
p.nmg.com.hk/egt589
下一頁：【 FlyJapan 】大阪美食懶人包！黑門、木津、中之島 3大魚市場 必吃必買清單 2017
