【手機降溫方法】呢2個月貌似會持續高溫，體感溫度接近40℃，熱得痛苦嘅唔止得人，仲有各種電子產品！夏天唔少人都會去海邊，想影相先發現部手機唔識郁，真係咩mood都冇晒！原來一招就能紓緩「手機中暑」問題！
撰文：Carmen｜圖片來源：Yahoo！Japan、網絡
用傳熱性高嘅金屬散熱
手機熱到死機時，相信好多人都會即刻用冷卻劑等，將手機「急凍」降溫。但咁樣做，分分鐘令手機更「短命」！急凍會令手機內部結霜，成為故障嘅原因。
最好嘅手機散熱方法，就係喺發熱嘅部分貼上傳熱性高嘅金屬，透過金屬內存熱力釋放。
傳熱性高嘅金屬有金、銀、銅等等，平時身上哪來的金、銀吖！咁就不妨試下用銅！
日本「神沙」散熱大法
大家次次去完日本，都想盡辦法散走嘅「神沙」硬幣，其實仲有散熱用途！將10円硬幣放喺手機背，如果得好少喺手，只放喺發熱部分都會有一定效果。要攞住手機行嘅話，喺硬幣上用膠紙貼住就可。
手提電腦嘅話，就喺發熱部分盡可能地放置10円。咁冇日幣10円喺手嘅話點算？香港硬幣嘅話，毫子嘅含銅量較高，可以試下用毫子代替10円！
手機溫度過高會出現「低溫燙傷」！
日本消費者廳就曾經為暖水袋嘅潛在危險性進行過調查，發現會造成「低溫燙傷」嘅溫度同接觸時長如下：
・44℃⋯⋯3～4小時
・46℃⋯⋯30分鐘～1小時
・50℃⋯⋯2～3分鐘
不同於高溫燙傷時會即時縮手，低溫燙傷係會逐少咁滲入到皮膚，好遲先會發現到皮膚赤痛。
以Apple手機為例，iOS系統嘅最佳運作溫度為0～35℃，放置保管時，環境溫度為-20℃～45℃，而開始出現「唔聽話」情況嘅，約為40℃左右。另外，防水設計嘅手機因為密封度高，所以須更小心留意發熱情況！
如果發現手機溫度過熱，最好嘅降溫方法就係熄機，等一陣先再開番。而且要謹記，手機唔好喺陽光下曝曬或者放喺悶熱地方，亦該避免長時間緊貼皮膚，預防「低溫燙傷」。