《Do姐有問題》| 金鈴慘慘推介世上最臭鰩魚送燒酒

《Do姐有問題》安排咗「問題特派員」去到世界各地搜尋特別嘅飲食文化同美食俾大家睇，首爾篇就搵嚟韓國留學嘅「問題少女」鄭金鈴，帶大家去首爾食被稱爲世界最臭食物嘅鰩魚，同埋試飲味道詭異嘅死屍湯！

推介01 | 世界最臭食物！韓國鰩魚（第14集）

東京就有個築地，嚟到首爾就有個鷺梁津水產市場，係韓國最大嘅水產批發零售市場，全韓國嘅海鮮都會運嚟呢度賣㗎！想食生即買即切即食嘅得，想食後製過嘅亦得！

金鈴帶得我哋嚟梗係食啲特別嘢啦，就係鰩魚喇，有咩特別？咪特別臭囉！鰩魚係被飲食節目稱爲世界百大最臭食物嘅第一位㗎！

鰩魚醃過發酵完之後叫洪魚膾，即係同我哋魚醃過之後叫鹹魚差唔多嘅道理啦，究竟有幾臭？韓國人形容爲十日無洗過嘅sss塔，行過都要揞住個鼻呀，你話有幾臭喇！

阿金鈴妹試完仲話覺得唔止係十日呀，係20日無沖厠咁嘅味囉… 不過唔好以爲咁臭無人食呀，韓國嘅老一輩好鍾意用嚟送燒酒㗎，紅白二事大時大節仲要買返啲看門口添呀！

地址：首爾市銅雀區鷺梁津洞13-8號 (顯示地圖)
電話：+82-2-814-2211~2
營業時間：10:30-20:00
網址：沒有提供
前往方法：地鐵1號線鷺梁津站1號出口反方向走，第一個路口左轉。

之後阿金鈴妹就去到一間韓國傳統料理餐廳，裡面就有韓國傳統大叔至愛嘅正宗美味，國民傳統美食！

點解呢種韓國人極like嘅食物，金鈴妹食完又係慘慘豬咁樣樣？學金句王話齋「鍾意就鍾意，唔鍾意就唔鍾意，唔好講埋啲咩L-I-K-E吖嘛！

原來呢種食物係同食韓燒時食嘅大醬湯一樣，係發酵食物嘅代表 – 淸麴醬湯，金鈴妹就食嘅時候會感覺到辣味，然後會再有詭異嘅 aftertaste… 所以韓國人稱之爲「死屍湯」…

雖然韓國人係咁叫佢，但係佢哋係鍾意到要撈飯食㗎… 呢樣先係最詭異囉唔該！難爲金鈴妹了 #陰公豬

地址：서울특별시 영등포구 당산동3가 396 / 서울특별시 영등포구 당산로31길 17 (顯示地圖)
電話：+82-2-672-7704
費用：KRW6,500 / 碗
網址：沒有提供
前往方法：位於2號/5號線永登浦區廳站。