我Travel佳雖然唔係影相專家，但對於旅遊都算幾有研究。有時同啲friend傾開偈，大家都覺得攝影科技係影響緊旅行方式，以前無論遠近，最多人用傻瓜機，而家prosumer呀、單反變得好普及。我自己嚟講，就鍾意電話影相嘅，貪佢輕身，最重要係無論去到邊，隨手見到靚景即刻影得，夠晒方便。
但你知唔知有咩電話堅係影相正先？我近排試玩咗部靚嘢，佢最大嘅賣點係彩色同黑白雙鏡頭，就係……賣個關子先！其實為咗試真啲佢，我特登精選咗5個香港影相靚位，一來俾大家知道要捕捉靚景，唔使下下出埠，喺香港都可以影到啲外國咁嘅地方，二來俾你見識下電話原來都可以影出「奶」味（即係Leica嘅味道）！
01.西環泳棚
呢個位我諗龍友唔會陌生，佢其實係西環域多利道近摩星嶺嗰邊，行落海邊會搵到嘅小泳棚。平日閒日就多泳客，放假時會多咗遊客，攝影發燒友當然係其中一類。泳棚本身嗰種vintage味已經好有feel，加埋近景有青洲島燈塔，遠望有大橋同大廈，點構圖都靚呀。
所以話只要識搵，唔使去塔斯曼尼亞嘅，香港都可以見到汪洋、孤島、無際水平線呢啲view。仲有，咪見佢好似與世隔絕，其實路經嘅巴士路線唔少，港鐵開埋堅尼地城站之後，行路都去到啊（google map就話行20分鐘，我Travel佳多數揸車去嘅，大家可以自己試下），好方便。
02.美孚饒宗頤文化館
呢個point可能少啲朋友知道，位於青山道，由美孚港鐵站可以行路上去，或者喺美孚、荔枝角站坐穿梭巴士又得（shuttle bus仲會去尖沙咀，不過只限落客）。佢由荔枝角醫院改建而成，除咗定期舉辦文化活動，有一半係文化酒店，仲有餐廳，加上附近高樓大廈又唔多，所以成個area無論建築定氣氛，幾有去咗台灣特色民宿嘅感覺。呢度亦好歡迎市民嚟參觀，喺入面會不時見到有唔同年齡層嘅朋友，約埋一齊嚟影下相、hea下咁，好寫意。
03.尖沙咀1881
同饒宗頤文化館一樣係活化古蹟，1881喺正尖沙咀星光行隔籬，係出名啲嘅。好處係出開尖沙咀shopping經過都可以隨時影下靚相，而且不時有一批批歐美遊客參加導賞團，聯合國面孔襯托純白色嘅維多利亞式建築，會有去咗歐洲嘅錯覺。而我覺得最正嘅係，佢啲走廊、樓梯嘅透光位好靚，如果部電話預設嘅黑白mode正，好似我試玩呢部咁，捕捉啲光影對比大嘅細節位，超有mood。
04.元朗東山古廟
行完港島九龍，我直入元朗～而我Travel佳唔會一嚟就介紹南生圍咁簡單嘅！離南生圍10至15分鐘車程，喺新田近落馬洲嗰邊，有間東山古廟。佢其實係天后廟，被列為香港三級歷史建築，之前因為白蟻侵蝕要大翻新，而家感覺新淨咗，格局保留到，仍然值得參觀。至於點解叫東山廟唔叫天后廟？因為係紀念文天祥堂細佬（文天瑞，字號東山）而改名嘅。雖然佢嘅背景幾local，但廟本身嘅特色建築，加埋周圍寧靜又開揚嘅環境，會令人覺得置身閩南福建一帶～
05.大埔滘
入得新界，梗係唔止去元朗啦，大埔亦係一個好地方。而除咗為人熟悉、有好多美食嘅大埔墟或者市中心，其實上番舊路（即係大埔公路），都有影相好去處，就係大埔滘自然護理區同大埔滘公園喇。前者最好做足行山準備先去，因為佢面積大，入面嘅自然教育徑又長，好啱「山系攝友」。
我就鍾意揸車停喺附近，影下石頭影下樹，或者行去附近嘅大埔滘公園坐下，呼吸下新鮮空氣，已經好relax。呢兩個地方都係擺脫繁囂嘅好去處，而且無其他郊野公園咁偏僻，接觸完大自然仲可以返大埔墟食好東西，正。
HUAWEI P9 Plus
無錯，我用嘅就係HUAWEI P9 Plus喇，啲靚相嘅水印已經出賣咗佢～部機最大賣點係後置咗1200萬像素Leica彩色及黑白雙鏡頭，影相時黑白同彩色鏡頭同時運作，黑白鏡頭捕捉細節，成像更加清晰；彩色鏡頭捕捉顏色，所以啲色更加飽滿。每張相仲可以加埋個Leica浮水印，一定呃到唔少Like。
而佢有得選擇光圈大細，仲可以影完先再校番個前後景深，另外有個專業模式，可以手動ISO、快門、測光、white balance……直頭可以當單反用。而且夠薄夠輕身，mon又夠大，簡直係完美結合相機同手機，好啱喺街頭或者去下啲就腳嘅特別景點玩snap shot！大家不妨入手番一部，去我介紹嘅地方親身體驗下，又或者發掘啲更加正嘅景點，同我分享下～