菠蘿山
難度：★★☆☆☆
長度：★★☆☆☆
時間：約三小時
起點：良景輕鐵站＞步行至王錦全小學
終點：下白泥＞小巴33號＞天水圍西鐵站
路線特色 : 港版大峽谷，下白泥靚靚日落，易行又清風送爽。但交通不算方便，尤其下白泥，離開時要等小巴出天水圍。
宜：影日落、影靚相、情侶、戀人未滿、行山初哥、三五知己。
忌：一班麻甩佬（太浪漫）、影山景、追求難度之人。
PS： 其實菠蘿山係位於大峽谷隔籬嘅一座小山，以下介紹條行山路線係唔會經過嘅！不過，由於近年菠蘿山已經變咗「大峽谷」嘅代名詞，為咗方便大家辨認，先用番菠蘿山個名。如造成任何混亂，敬請見諒！
2017年4月22日更新：由於有市民於青山靶場內進行非法耕種，駐港解放軍近日貼出通告，內文指「為有效管理和保護軍事設施，駐軍決定於2017年4月24日起，對青山靶場內的非法耕種點進行清理整治。」又警告當地屬軍事禁區，未經准許擅入或會被檢控，郊遊人士請注意！
沿途景點
01 | 小峽谷
一開始一路上斜，好快就會喺1:14pm見到小峽谷。雖然未到大峽谷，但都可以影住相先。
02 | 大峽谷
行到1:40pm就會見到「此路危險」嘅告示牌，即係已經到咗大峽谷喇！未去過真嗰個，睇住個本土嘅先，都幾開心啦！
03 | 重要的分岔路
好多人一場去到菠蘿山，都會落埋下白泥睇日落。大家認住2:22pm呢條分岔路，兩邊都可以去到目的地嘅！而Joyee Walker就介紹大家行左邊，因為會經過漁塘，幾有鄉村氣息。
04 | 下白泥
行多10分鐘左右，終於喺3:36pm到達目的地下白泥。不過好可惜，片段就影唔到日落喇！睇日落都好講運氣嘅，希望大家去嗰時見到啦！
菠蘿山 純文字攻略：
- 喺良景輕鐵站集合，再步行到王錦全小學出發！
- 約2分鐘：右轉見到有路上山。
- 約30分鐘：見到第一個休息點。
- 約55分鐘：到達小峽谷。
- 約1小時15分鐘：到達大峽谷。
- 約1小時50分鐘：落到山見到一個鐵線欄，右轉前往下白泥。
- 約2小時：見到有條小鐵柱嘅分岔路，直走經稔灣路到下白泥，左轉經漁塘到下白泥，請左轉。
- 漁塘路線有少少複雜，建議先睇熟Joyee Walker嘅片，到時有混亂可看Google Maps，向下白泥公廁進發。
- 約2小時25分鐘：到達終點小巴站。去下白泥嘅，繼續沿馬路直去前往下白泥。
- 約2小時35分鐘：到達下白泥。
- 有小巴返到天水圍西鐵站。
去片：