【馬來西亞】價值$12000的忘不了魚究竟何方神聖?@深導遊

今次，除左食之外，我地仲可以一睹忘不了魚嘅真身，去餵野生忘不了，仲落水同佢一齊游水！夠晒特別啦掛！
地點係馬來西亞古晉既kampong terbat，呢條村嘅河有好多野生忘不了魚，不過平日禁止捕捉，只有每年五月，村民先會捕魚過節。
忘不了魚好為食，我一放魚糧就成羣結隊過哂嚟。不過佢地游水好快，想試捉都好難。

對深導遊嚟講，餵佢地食魚糧已經滿足唔到我，我想同忘不了魚再親近啲，決定落水一戰！
最好笑嘅情況出現了！我一落水，啲魚就被我龐大身軀嚇走哂，仲要成兜魚糧跌哂。諗起都好好笑！

鏡頭一轉，就到活生生嘅忘不了魚出場。『活生生』係重點，因為忘不了魚係野生河鮮，唔係話捉就捉到。要食就要早幾天預約，希望土著們幸運地幫你捕獲到忘不了魚。而且佢地很容易在運送過程中死亡，所以要吃到完全新鮮嘅忘不了魚是很難，亦因此呢條魚價值萬二蚊。

哇！呢條超過二十寸長，三公斤，價值HKD$12000既忘不了魚，我係爭崩頭先可以有幸同佢合照炸！不過都唔可以影太耐，如果唔係新鮮都變唔新鮮！

終於要到食嘅環節，要品嚐最好味嘅忘不了魚，需要符合幾個條件，包括野生、新鮮、同趁熱食！ 而好多時為咗要食到最原汁原味，大多數廚師都會選擇清蒸。

要食啦…！第一次食到入口即溶嘅蒸魚，好肥美，有好獨特既魚香，呢種魚香係忘不了魚獨有，來自佢地好喜歡食嘅風車果。而且佢啖啖都係肉，每啖肉都充滿住魚油、魚香，真係好好味！
佢仲有一個特別之處，就係魚鱗都食得。第一次食魚鱗，忘不了魚嘅魚鱗好大塊，一片片咁食，又爽又脆又煙韌，好得意！亦有廚師將魚鱗炸到脆卜卜，一路睇戲一路食一定好正！哈哈

深導遊最終食評：忘不了魚，我會忘不了你嫁！(你睇我食到魚骨都啜埋就知啦！)

延伸閱讀：

深導遊闖砂勞越‬文化村玩結婚？

搶住夾！京都流水麵

奈良鹿零距離接觸影相秘訣