1)「唔巧意思，你認錯人⋯⋯」
迪迪尼咁多卡通人物，識唔哂都好正常，不過有D客「認錯人」都認錯得好有創意～例如：
「喂～那邊又有一個白雪公主，拍完這個白雪公主過去拍那個吧！」好多人叫唔出D公主名，就全部都叫做「白雪公主」，彷彿係一個統稱。
「你看！有瑪麗蓮·夢露耶！」Erm…佢係美女與野獸嘅Belle，條裙咁重應該飛唔起⋯
「那隻白貓？我認得！白貓洗衣粉嘛！」洗衫、洗衫、唔洗憂，有白貓幫你手～（我唔知Marie識唔識洗衫）
認錯人來講，花木蘭入面嘅Mushu可以話係重災，雖然佢知名度真係唔高，但係D客亦實在太有創意，我聽過嘅有海龍王、恐龍、七龍珠神龍、牛魔王、豬、曱甴⋯⋯
2)「請問咖啡灣點去？」
問路日日都有，同事嗰次被問到去「咖啡灣」真係有D驚訝，佢load咗一陣，然後忍住笑回答：
「“咖啡灣”就要行呢邊去出口，然後搭番港鐵過去。不過如果你想去“咖啡杯”就係呢邊，幻想世界裡面。」
3) 黑色的
話說有一次，有個同事忍住笑指向一位正在同卡通人物影相嘅大媽細細聲同我講：
「你睇下⋯佢⋯黑色的⋯」
「咩呀？咩黑色的？」
「黑色的呀，佢黑色“的”⋯」
我仔細一睇，果位大媽著住一件白色波點裙，因為天氣熱而濕到痴住個身，身上眾多波點之中，唯獨胸前有兩點係半透明嘅淺黑色，呢一刻我先赫然發現佢疑似冇戴巴巴⋯⋯
我差D成個早餐噴咗出嚟。
4) 「看著我的唇！」
圖片來源：http://m.getjetso.com/?action=thread&tid=407427
有一位大媽，排緊白雪公主影相果時，話：
「白雪公主真漂亮，我也要涂一下口紅」
之後就拎支唇膏出嚟，見到一位同事喺佢附近，就好認真咁望住佢，大聲講：
「看著我的唇！」
然後係同事面前開始搽，我同事保持親切笑容忍住唔爆笑，然後大媽仲問：
「漂不漂亮？？」
同事讚佢：「真漂亮！真漂亮！」
我覺得呢位同事真係好勁。
5) 「請問3點半個巡遊幾點開始？」
唔係講笑，好多好多同事都被問過呢個問題，而通常好有禮拜地回答：
「3點半嘅巡遊，咪就係3點半開始啦。」
之後個客就會好老尷咁再問：
「呀，唔好意思，請問3點半個巡遊係邊度開始？」
6) 巴斯光年打手槍？
其實唔止客，有時自己做到攰攰地都會唔小心7咗。記得有一次有個客走埋嚟問我：
「請問那个巴斯光年巴斯光年星際歷險是玩甚麽的？」（普通話）
巴斯光年係個射擊遊戲，我諗咗一陣，然後用普通話答：
「那是打手槍的！」
一講完我就知出事，個客先嚇一嚇，然後好開心咁入咗去玩⋯⋯希望唔會令佢太失望啦。