01）網上訂酒店……寫評論都賺里數？
你只要透過Agoda、Hotels.com或Expedia特定網頁成功訂房，每HK$10就可以賺2里！如果透過Ctrip預訂酒店住宿，亦可以每人民幣20元賺取3里！打算暑假外遊嘅朋友咪錯過呢個好機會！
另外真係唔講唔知，原來去TripAdvisor貓途鷹網站用繁體中文寫評論都有得賺里數，每寫一則評論最多可以賺50里，下次大家諗住寫酒店評論時可以利用埋呢個機會儲里數！
02）笨豬跳賺里數？唱K賺里數？
大家有冇諗過玩Bungee Jump都有得儲里數？唔講唔知，原來去澳門旅遊塔AJ Hackett玩一次笨豬跳、高飛跳或者百步登天體驗，就可以賺到1,000里數！參加空中漫步X版及石岩攀爬體驗就有500里，啱晒鍾意玩刺激活動嘅朋友！
畏高人士聽到呢類玩意可能會耍手擰頭，不過都唔使失望，就算留喺本地玩原來都儲到里數！只要你係Red MR會員，去指定分店唱K滿$800就可以每$10賺1里！提提大家，記得要喺購票／結賬時出示番張「亞洲萬里通」會員卡！
03）入油賺里數？租車買車都可以……
入油都可以賺飛行里數？冇錯！只要你參加Esso油站Smile車主獎賞計劃，每儲5 Smiles積分就換到1里。咁點儲Smiles積分呢？平時每入1公升Synergy F-1特級汽油，就可以賺15 Smiles積分，以一般私家車油缸容量40公升咁計，只要你入滿油缸一次就賺到120飛行里數！不過，想享有呢個優惠，就要先填好「亞洲萬里通」里數轉換表格，再將表格交俾任何一間Esso加油站。
仲有，其實租車買車都可以儲里數！大家每次透過Sixt、Europcar同皇冠汽車等商戶租車買車，都可以賺到500飛行里數。其中如果喺皇冠汽車等商戶選購指定型號車輛，甚至仲可以一口氣賺成20,000里添！
04）過大海、坐機鐵，又賺里數！
每次坐TurboJet噴射飛航去澳門，只要以正價買指定航線單程或來回船票，原來可以賺里數！買普通位來回船飛可以賺80里，而豪華位就有150里，下次大家過大海不妨用下呢個優惠！不過，大家記得要喺碼頭售票處買船飛，同埋出示番「亞洲萬里通」會員卡！
仲有，如果你登記參加機場快線「多乘賞」計劃，每4獎分可以轉換為200「亞洲萬里通」里數。下次搭機鐵時記得順手儲埋里數！
05）訂報紙雜誌，都有里數賺？
原來訂報紙同雜誌都可以儲到里數！而家只要訂閱《南華早報》一年（星期一至日），可以賺4,000里，而首次訂閱《經濟學人》印刷版或者電子版一年嘅朋友就可以賺1,500里數，訂夠3年仲可以賺高達6,500里添！不過大家要記得喺訂閱之前註明自己個「亞洲萬里通」會員號碼。
06）洗衫都洗出一堆里數！
唔少人不時都會幫襯洗衣店嘅乾洗服務，而你估唔到嘅係，洗衫都可以賺到里數！而家大家只要去全港雅潔洗衣店分店洗衫滿$150，每$8就可以換到5里，方法好簡單，大家只要喺洗衫之前向店員出示亞洲萬里通會員卡就得喇！
07）做Body Check，居然Check出好多里數！
想了解自己嘅健康狀況，定期做身體檢查係必須嘅，但做體檢都唔平，如果可以使錢時賺番啲里數就抵好多！而家去確進醫療或者卓健醫療選用指定健康檢查服務或者購買疫苗注射計劃，分別可以每$8=5里同每$2=1里嘅比率賺里數。不過要留意，想透過確進醫療賺取里數，最低消費額為$2,000。
08）「唱」錢「唱」出里數來！
大家去外地旅行成日要換外幣用，但你又有冇諗過原來喺唔同地區（包括香港、日本、上海同北京等）嘅Travelex分店兌換外幣，都可以賺取里數呢？不同地區分店嘅兌換比率都有唔同嘅里數優惠，譬如喺香港兌換滿HK$3,000，就可以每HK$40賺1里，金額愈多，兌換里數個比率就愈著數，下次換錢嗰時記得留意下Travelex分店啦！
09）「亞洲萬里通」iShop你要識上，好多里數呀！
想賺多啲飛行里數，就一定要識「亞洲萬里通」iShop！佢哋嘅iShop同世界各大著名商戶合作，留喺屋企就可以輕易買到心頭好，而且喺唔同商店買嘢都會有不同嘅里數優惠送番比你。好似去淘寶就每買US$1，就送你1.5里數！去日本樂天市場同Zalora就每US$1送2.5里數！iShop不時會推出限期優惠，唔想錯過賺里數嘅好機會就要密切留意喇！
