以前睇娜姐噴血寫真、某某明星白教堂夢幻婚禮，陽光天堂關島、塞班島得個恨字，終於等到有廉航開直航喇！HK Express將於今年12月15日開設直飛關島航線，以及明年1月17日直飛塞班島。兩島位於太平洋西北部，航程約4至5小時就到。
01 | 是否要美國簽證？
不用，不用，不用！超級重要講三次，嘩慳至少$1,200啊！關島、塞班島為美屬島嶼，可是，一般情況下，持特區護照或BNO 人士前往均無須申請美國簽證， 逗留時間為45天。當然，如果之前有被拒入境或違規紀錄，可能就要問清楚及申請簽證。溫馨提示，美國入境官網寫明，旅客須具來回機票，即入境時已要有回程機票。另外機上要填妥及簽署2張表格，而且就算於當地過關入境時都要出示香港身份證，大家排隊時可以拎定出來，咁就更順暢啦。
02 | 什麼月份去最好？
去到 關島塞班島 一定要玩水上活動及潛水，兩島全年如夏，平均溫度約28℃，最低溫度都有約23℃，所以幾時落水都不成問題。要留意的是7至11月雨季，遇上颱風機會較大，好多熱門活動如Skydive、笨豬跳都會受影響，12月或打後出發較佳，大家不妨去避寒，來個熱辣辣假期。
03 | 如何一次過玩晒關島+塞班島？
關島塞班島 相距不遠，當然一次過要掃齊兩個陽光天堂。往返兩島要乘飛機，機程約50分鐘。聯合航空天天有直航，以11月為例，單程機票一般千鬆元，見到約$700較抵的航班多數是凌晨機，到時搵鬼接你咩。大家亦可試下坐Freedom Air 小型飛機，價錢單程約$930，重點是機艙較細，有機會同時望到左邊關島、右邊塞班島的畫面。好多人上到機都會瞓，呢程千祈唔好， 個景靚到癲！
04 | 跳島之旅 附近仲有咩島玩？
夢寐以求太平洋之旅，離 關島塞班島 約30分鐘飛機航程的「羅塔島」（Rota）連Wonder Girls 都去影雜誌封面，當地有一個天然大海游泳池奇景，見IG 有超多日妹、韓妹打卡。 關島塞班島 之間仲有個「天寧島」（Tinian）小島有天然噴洞奇景、二戰軍事古蹟，由塞班遠眺可見， 搭小型飛機約15分鐘。地圖所見，關島、塞班與夏威夷好像挺「順路」，但由關島轉飛機票要過萬蚊，建議去夏威夷，都是經東京轉機較抵。