「8鯊共游」大匯演?
動物環境欠佳、虐打表演動物，有關長隆虐待動物的報導經常出現，國內動保團體亦曾發起聯署活動，呼籲群眾一票都唔好買，但長隆一於少理，3個月前更變本加厲，引入多 3 條野生鯨鯊，即係話，合共 8 條長 5 米至 7 米的鯨鯊會在高 8.3 米、寬 39.6 米的水族館展示窗前游來游去，諗起都覺得迫！
我以為自己去咗海鮮酒家…
本人早前到過事發地點，去過先知事態嚴重。8條鯨鯊，幾乎一眼睇哂，所謂打破健力士世界紀錄嘅「最大水族館」，哂氣！我最深刻嘅係隔離位強國Camera Man，一邊開機影嘢，一邊同同事講：「咁多條你最想食邊條？我最想食最大個條！」講堅當刻我以為自己去咗海鮮酒家，中國人果真係冇嘢唔敢擺入口！當我心不禁涼了半截之際，前面大叔又用手機同鯨鯊瘋狂影相，飛哂閃燈咁，人都被佢嚇親，何況動物呢！
再睇睇小朋友，幾十個小朋友起勢拍塊玻璃，一邊拍，一邊叫鯨鯊理吓佢哋，冇錯，小朋友係無辜嘅，帶佢哋入場嘅大人先罪該萬死！加上場館工作人員又唔夠，成個場嘈過街市！
我嘗試好努力聽吓現場大會主持講啲乜，結果，我聽到「鯨鯊保育就是長隆最引以為傲的事情」！講保育，真係我識條X咩，於是上官網見識吓：
「对于鲸鲨来说，足够大的活动空间非常重要……透过高8.3米、宽39.6米的亚克力板，8条鲸鲨按照自己喜欢的路线活跃地游来游去」
「8 鯊共游」再追加?
要知道鯨鯊係世上體型最大的魚類，一條鯨鯊 5 至 7 米長，個水缸真係點計都唔啱數，活動空間實情少得可憐。正當我以為「8 鯊共游」係極限！錯喇，上月就有報導指印尼野生動物組織Wildlife Crimes Unit（WCS）突擊搜查一間海洋生物供應商Blue Aquatic Co.，成功破獲一單非法補獲及出口鯨鯊案件，據調查知情人士透露，有證據顯示兩條鯨鯊將被販賣到長隆海洋王國。首先鯨鯊在印尼係受保護動物，捕獲鯨鯊已經唔合法。如果事件屬實，所謂健力士「最大水族館」，原來只喺用嚟打破最多鯨鯊共游一缸的紀錄。說好的海洋保育，真係難聽過粗口。
圈養鯨鯊的壞處多多，隨便在網上google已有相關資料！
- 野外鯨鯊壽命70-100歲，但人工飼養鯨鯊壽命會縮短，最短紀錄是16個月
- 年幼鯨鯊體型會繼續長大，有水族館曾低估體積而放生
- 即使放生鯨鯊，鯨鯊會因不適應而死亡，生存率極低
有人視鯨鯊為食物，有人視為生財工具，不過問心一句：水族館的出現當真必要？作為消費者，去旅行有咁多選擇，水族館係咪非去不可呢（動物園都係）？尤其臨近暑假旅遊旺季，有冇諗過剔走水族館這個行程？冇錯！與其呼籲親戚朋友杯葛長隆，公道啲，世界各地其實有好多水族館仲設有動物表演環節，通通都值得抵制。想帶小朋友大開眼界？要學嘢，睇《海豚灣》可能更好。嫌血腥？睇BBC earth、Discovery Channel都一樣得，要知道野生動物唔係寵物，居住地係大自然，拒絕做幫兇，麻煩一票都唔好買。