早排帶隊去日本大阪趁環球影城，食完個晚餐順手買咗杯 限定抹茶雪糕 ，返到 USJ 酒店都仲頂住食唔落，但酒店雪櫃仔多數唔夠凍，咁呢啲情況，大家會點做呢？
文：杜遊珍 圖片：杜遊珍、互聯網
01) 「雪」和「冰」是兩件事
酒店雪櫃 仔多數預你雪下飲品，未必有冰格，就算有都未必夠凍！有團友試過買支雪條食到一半(點解唔食埋佢？)，連包裝紙放入去雪櫃想一陣餓再食，結果？溶到一櫃都係，辛苦晒清潔姐姐啦！
02) 酒店櫃檯幫到你
大概係亂咁存放雪糕喺冰格大有人在，東京個別有酒店提供溫馨提示，寫明「房內雪櫃不適用冰藏，如有需要食物可放到櫃檯代為處理」。阿珍試過喺USJ酒店成功存放Häagen-Dazs，做法係走落 Lobby 請櫃檯姐姐幫我冰，仲會掛埋房號牌仔標認，好尊貴！其實日本、台灣有不少酒店都有此服務，但要記住「幫你是人情，唔幫是道理」。
03) 宅配註明冰鎮
阿珍平時亦會幫襯宅配購物服務來買手信，貪佢直送到酒店。如果訂了 Roll Cake 、急凍蟹 等冷藏食物，自己都有責任要提店家於包裝上大大隻標到明為「冷藏食物」，再跟手同酒店交代好收貨時間，幫手在收件後冷凍，咁就萬無一失喇！
04) 餵奶媽媽要注意
酒店雪櫃唔夠凍呢個情況呢，餵奶媽媽就最關心！出外旅行如何「雪奶」、「冰奶」好重要，唔少媽媽仲會打去酒店問清楚有沒有貯存服務，再自己帶定 fridge to go 、冰種、冰袋，mark 好晒食用日期添！
最後送上終極一招，唔好諗咁多：
溶之前，食哂佢！！