話說這航班是我在被人 stand by 捉的，連我在內合共 4 名機師，兩人（港人機師）兩鬼（兩個鬼佬）輪流當值，兩鬼做前半，兩人做後半，所以在香港起飛後不久，我便與另一名港產機師先去眠一眠。
航班過了大概一半，我們兩個便回到駕駛艙，讓兩名鬼佬機師可以休息一下。Head 姐看到我們換了更，便到駕駛艙來講聲哈囉，更告訴我們說有個空姐妹妹有問題想問我們，我們當然無任歡迎。
7 月撞正「撞鬼飛機」
「頭先勁恐怖囉！」空姐妹妹一進來，劈頭第一句便說。
「咩事？」我們反問。
「由上機開始，成個 galley（機上小廚房） 都凍到雪櫃咁，跟住做 service 之前阿姐 heat 餐，有個 oven 無啦啦壞咗，搞到有啲餐唔凍唔熱咁囉！」
「飛機有嘢壞好正常啫……」我邊說邊在螢光幕上顯示出飛機的空調狀況。「依家機尾都廿四度喎。」
「Galley 肯定冇廿四度囉！」空姐妹妹回答。「你知唔知今日咩日子呀？盂蘭節呀！仲要飛呢隻撞鬼機！」
我望一望駕駛艙前方，一塊印有飛機註冊編號的牌。這架的確是空姐空少之間流傳得疑幻疑真，著名的「撞鬼飛機」。江湖傳聞說在這飛機 galley 的 oven 常常跳掣，而且 crew bunk（機組人員休息室） 內更有個小朋友跑來跑去騷擾空姐睡覺！
貨艙現怪聲
「你又話有嘢要問嘅？」另外一位機師問她。
「我想問，今日我哋班機有冇咩特別乘客？例如狗仔？」
「冇喎……」
「頭先 crew rest 嗰陣，我瞓瞓下醒咗，隱隱約約聽到啲怪叫聲，之後就瞓唔番喇……」空姐妹妹很認真地說。
「你講真定講假呀？」
「講真㗎！另一個 crew 都聽到，所以我哋兩個早咗落返嚟。我哋仲安慰自己，諗住有狗仔喺 cargo hold，所以想問下你哋……」
「今班機冇動物喎。而且 crew bunk（機組人員休息室） 喺上層，cargo hold 喺下層，中間夾住啲客，就算有狗吠，你喺 crew bunk 都唔應該聽到喎！」我們嘗試理性分析。
「哎吔！好驚驚呀！可唔可以飛快啲，早啲到早啲落機？」
「我都想，不過唔夠油。」
空姐妹妹離開駕駛艙後，我們對她的故事採取不置可否的態度。空姐空少之間常常都有鬼古流傳，大多都是在甚麼甚麼地方的酒店內，又或是甚麼甚麼飛機上。聽得多就不會信，管他是盂蘭節還是萬聖節！
鬼佬機師「被鬼搖」
因此，我們兩個香港仔就繼續工作。大家香港人講廣東話，吹水唔抹嘴，笑說一定是某些空姐空少捏造關於某酒店的故事，令自己更容易調更換到喜愛的目的地，甚至是空少用鬼古來嚇嚇空姐，以增加 share room 的機會。
吹水的時光過得特別快。過了不久，鬼佬機長已經打電話進來說要回來。看一看飛行電腦，還有兩小時才到達目的地，所以鬼佬機長一進來，我們便問他為甚麼這麼早回來。他聽到問題後一面愕然。
「甚麼？還有兩小時？為甚麼你們這麼早搖我的腳叫我起床？」
「甚麼？我們沒有！我們連駕駛艙都沒有離開過呀……」
