早幾日同姊妹 Amy 敍舊飲茶，原來佢近來過咗澳門賭場做公關（嗱，乾淨嗰啲呀吓！），聽埋聽埋好多 賭場風水 秘聞！梗係要同大家分享下啦！
01) 有入無出困住你
查實馬交嘅賭場暗藏風水格局早就唔係新聞，最經典嘅「首都酒店」鳥籠設計，就擺明邪到你有入冇出。
02) 神主牌都出埋？
近年新酒店門面睇落好摩登，以為冇風水局啦？中伏喇！聽 Amy 講，「新首都酒店」外形成個神主牌、又似一把金劍倒插在地上，邪氣盛、實行大殺三方！
03) 金龍舞動夠哂氣勢
又如氹仔「舞水酒店」，賭場外有大大條金龍擘大口，喪吸財氣；但最好笑係成日有強國同胞當正條龍係影相位，排住隊畀佢邪！
04) 外國勢力一樣講風水
老外賭場一樣有做嘢；例如「意大利酒店」金雕玉砌，但成日行過都見做緊小裝修，執吓電線髹吓灰水咁，點解呀？裝修裝修，大「莊」「收」錢吖嘛！
05) 絕地睇表演
不過講最絕，肯定係「維尼酒店」，大門口定時有表演，你以為真係咁好益街坊？實情係做緊《易經》六十四卦，叫做「火水未濟」，寓意睇騷者一事無成、半途而廢……
Amy 愈講愈神怪；計我話，除左 賭場風水 外，其實賭場規矩一早有晒科學分析，睇落贏面最大的大細同輪盤，其實贏嘅機會都只係得四成，長賭輸梗！都係奉勸大家玩兩手，見好就收割禾青！
