呢個星期日,見天氣好,於是一個人單挑去大東,因為我係一個人關係,就係東涌地鐵站對出逸富東商場上車,唔洗行去總站(如果有十人以上都係去總站,有時會無位)。等一陣就有車黎,今日都唔係好多人,
記得預備現金搭車會平差唔多一半,坐嶼巴3M 10分鐘到就到,因為而家都有報站,所以都唔洗問司機,坐到伯公坳落車。
落左車之後向前行,
開始落小小斜個時左邊就係你上大東山條路,深呼吸一下就上天梯~
唔想走回頭路,所以目的地係南山,佢話3個鐘唔洗,唔休息或者你係小明未係囉!如果想上鳳凰山其實都係過對面馬路開始行。
一開始都係上山,見到山頂這麼近,其實行落先知係那麼遠。
鬼叫你窮無得搭直升機上去咩,係要頂硬上啦!
爬左一粒鐘,終於見到有D野睇,望到個海就係貝澳,其實望落同泰國布吉差唔多JA~
一張用黎留明的相。
一路上山都無咩風,一有風就可以影到芒草動態,好想風繼續吹過黎!
無風個時未同我一樣棟左起度。
其實沿住大路行係上唔到大東山山頂,只會刷邊而過,所以想上頂就要識得睇住條路~
行左個幾鐘後左邊應該無啦啦見到幾舊石叫你過去,你見到小路就可以爆上去,當然要小心地斜!
上到去左邊會見到有條柱,行過去就會有打卡位~大東山頂。
你已經成功上到869米高。
坐係前面夠石可以望到東涌。
沿返頭先行黎條路落去,但唔洗轉右,可直行見到爛頭營先落山,其實落山點落都得,有路或者根本唔係路都可以行,只要小心就得!
落番黎呢道會行番大路,如果頭先唔夠膽上斜就可以係呢道轉左上大東山,如果都係覺得難就唔好勉強!
總之未過L014呢個牌前就要轉上去山頂~
落番黎見到成山都係爛頭營,又係影相位。
不過唔該拎走返垃圾唔好俾人話廢青污染地球。
沿路一直行多五分鐘,左邊會有條黃龍坑徑落番東涌,寫住一個鐘就落到去,但我從來都無試過,因為一個鐘由800米落番地平線梯級一定好大級,(經歷過大帽山落梧桐寨膝頭痛左成個星期就唔敢試)唯有順走南山,其實行得快都唔係差好遠。
呢條路舒服好多。
不過就黎到南山已經開始黑。
落到黎最後五分鐘已經黑晒,影相要開閃光燈,如果落到黎呢道已經無力,見到呢個牌唔好跟梅窩個邊行,轉右邊再轉左行嶼南道會上少個山仔。
轉右行兩步再轉左見到呢個牌行就岩,不過行落去郊野公園管理處有狗,唔好理佢就得。
行多五分鐘就見到呢個牌,其實都係差唔多,想去一去廁所就行南山古道。
出到黎就會見呢座唔知咩黎,向番後行就係巴士站,繼續向前落斜行多三分里就可以繼續落梅窩。
因為自己好肚餓所以放棄繼續行,係巴士站等梅窩巴士(其實往梅窩方向係黎咩車都上得,全部一樣價錢,只係二號唔入梅窩舊墟直落碼頭)
我好好彩真係等到部唔入舊墟2號巴士。但唔想再等唯有自己行十分鐘行入去,想搭船番中環就係度搭。
跟住指示牌唔好向M記個邊行,會見到間海景酒店。
然後過橋仔轉左。
行到車路見到梅窩街市,係街市行個圈搵體育館。
無錯,因為太熱,我係黎沖涼,呢道沖涼有冷氣,又有熱水,仲起多左一外格比你放鞋放衫,D野唔洗放出面,沖完涼出番黎已經兩個世界。(其實係自己怪癖,一行完山會搵最近體育館沖涼)
之後隨便搵野食,去左意大利個頭間羅馬餐廳食飯,有特飲有湯,有飯有薯條。
都只係62蚊。
如果無搭車行落黎就係行三公里,都慳番五蚊車錢。
頭先睇到個間海景酒店近景,其實佢叫銀鑛灣渡假酒店,梅窩應該得呢間酒店!
之後行番去碼頭坐架德國車3M番東涌!
今日又好似環遊世界左一圈咁~
參考時間:13:40上3M,16:00到大東山,到南山:18:15
行大東注意TIPS:
1. 沿途無補給,請備足夠糧水,預多好過預少,特別係而家有時天氣都係熱,會飲好多水。
2. 東涌往伯公坳巴士有現金分段,平日$6/假日期11.8,正價係$10.5/$16.2,其實多人都差好遠。
3.假日諗住搭的士應該CALL上台,因為大嶼山的士好少,假日剩係做CALL台都唔夠做,係東涌死等可能等好耐。
4.沿途無廁所,係東涌應該去先埋。
5.沿途無垃圾桶,請自行拎走垃圾。
6.如果體力唔係太好,一開始可以係樓梯旁睇下,執D長少少竹枝,上山時可借力。
7.如果不想或不預備夜行,1630一定要開始下山,不然未下到山已經天黑。
8.每500米會有一枝標距柱,如果是沿伯公坳至南山應該沿路一直會見到。
9.現時天氣變幻不定,最好帶定傘,無雨也可當遮太陽之用。
10.行大東山對新手黎講負重都可以影響速度,如第一次行應考慮不要背太多東西。
如有任何疑問可電郵:[email protected]
